Laimi hi khuaruat huaha loin thil kan tuah tawn tikah kan i palh lengmang. Voikhat cu Than Tlang CJC Biakinn ah Rev. Tuan Peng Thang cu Thawng Tha chimnak a rak ngei ding a si i, Than Tlang khua upa Dr. Hmuh Thang le Pu Lal Mawng Cung tbk hna pumhnak ahcun an rak phan hna.
Rev. Tuan Peng Thang nih a chimmi cu 'pumhhruaitu (Chairman) a vun tho i, a tui tuk i atu cu Thawng Tha chimtu sawmnak caah Lamhlal Pi ah Pathian a bia lomi timi hla kha kan sa ta lai' tiah keimah sawmnak caah hla a kan sak pi a ti.
Chairman pa hlasak sawmnak nih Rev Peng a lung a rak tong lo tuk. Hitihin a lungtlin lonak a chim.
'Hla hna hi Thawng Tha chim sawmnak caah an phuahmi a si lo. Mi an tling deuh rih lo le mi hngahnak ah kan sa lai hei ti" tiah a lungtlin lonak fak ngaiin a langhter. Capo biatak in a vun peh thanmi cu 'hla hi ka phuah lai i, mi hngahnak an sak lai ti ka phang tuk... mi hngahnak sak ding ah an phuah a si loh!' tiah fak tak in a chim.
'Thawng Tha chimtu sawmnak caah an phuah lo. Pathian thangthatnak caah an phuah. Saya Peng sawmnak ah hla kan sa lai a ti. Cucu keimah sawmnak ah hlasak a hau lomi' tiah a chim chih.
A vun peh thanmi cu 'hla cu an sa i, suimilam pakhat le minute kul chung an sa. Lian Lian pa, mifim kan ti cu nazi hleihnih ah khual a nei ding a si i, a tling cuahmah cang. Chuah le phundang ah a ruah lai a ti i, a ra... le a sir te hin, saya Peng na Thawng Tha chim ngaih manh dawh ka si ti lo e.
Nazi hleihnih ah Rangoon leiin khua a ra ding a si le hi, kan chuah tak lai, phundang in ruat hlah awh ... a chuah pah te ah a ka chimhmi cu an sakmi hi a number zong um lo, a caang zong a um lo le zeitik an dih lai theih a si lo a ti le a chuak' tiah Rev Peng nih a chim.
Hlasak chung i a lam i a kuimi vialte cu minute pahra chungah cun an i hngilh dih tiah a chim.
Rev. Tuan Peng Thang chimmi hi Laimi zong nih kan ruah cio a hau cang. CJC biakinn ah a tonmi a si ko nain CJC lawng ah si loin Laimi tampi nih kan tuah tawnmi a si. Mi hngahnak te hna le mi sawmnak te hna ah hlasak kan hmanmi hi cu khuaruah lo tuk le thil theih lo tuk bia an si ko. Hi bia nih thatnak a kan pek cio lai tiah kan zumh!