North Korea hruaitu Kim Jong-un sual ning hi an chim in an chim kho lo. North Korea hi thlithup ram ah a ser i a lenglei in North Korea cozah riantuannak theih khawh a si lo. Zeituk in dah ramchung ah sifak le harsat an tam i, thongtla an tuar timi hi a chim in an chim kho lo.
North Korea ralkap rian a tuanmi nu pakhat nih North Korean thongtla tuar ning le dirhmun a hmuhmi a chim. Amah hi a congtu a si i, an si ning vialte a hmuh hna i a theih dih hna. A voikhatnak a chim a si. Lim Hye-jin nih a chimmi cu 'ni fatin in thahnak a um, hremnak a um, tlaihhremnak a um' a ti.
Kim Jong-un nih naite in thahnak camp (death camp) a ser chin lengmang. Ramkhel ruangah thongtla hi 200,000 hrawng an um hna i, thih-bawh in thong chungah hren le hrem le riantuanter an si. North Korea cozah nih remkhel ruangah thongtla poah cu kan ral an si tiah an ruah hna i, zaangfahnak an ngei hna lo.
Voikhat cu North Korea tlaang pakhat i thongtla camp an sermi ah unau pahnih an zam i an tlaih than hna. Lim nih a chimmi cu 'thongtla vialte hna hmaiah an pahnih in an hngawng an tan hna. Thongtla vialte an kan uah dih i, nan ngamh cun zam u tiah ralrin peknak caah kan hmaika ah an hngawng an tan hna' tiah a chim.
Voikhat ah nu pakhat cu bia an hal i, a haltu pa a thinhung cang i a angki le a thilpuan a phoih dih i mei in a khangh tiah a chim. Chungkhar pasarih zong an dawng tein hmun khat ah an thah dih hna. Minung hmanh ah an ruat hna lo. Saram tluk hmanh in minung an tuah hna lo a ti.
Thong chungah minung a ummi hna hi an tihaal, an rawltam, ni fatin in rian har lawng te an tuanter hna. An der ning le zaangfak an si ning hi chim khawh ding a si lo. Cheukhat a thimi hna cu an der tuk cang ruangah an ruak i a car in a car a ti.
Zarh khat ah ni sarih chung rian an tuanter hna. Ni khat ah suimilam 16 chung rian an tuan. Zan ah leng a chuakmi cu an kah hna. Pakhat le pakhat karlak ah zaangfahnak ngeih lo ding in cawnpiak le rengh an si. 'Zaangfah awk tha loin sualnak a tuahmi an si tiah chimh le cawnpiak kan si ve. Asinain kanmah bantuk cio an si. Ka sualnak ka thei chin lengmang a ti.
Kim Jong-un nih cun thongtla camp kan ngei lo tiah a pheh. Asinain hngakchia le nu he pa hi camp ah an tam tuk. Ralkap le congtu nih nu kip hi an sual pi hna i an tuaitam lengmang hna. Congtu le ralkap nih thongtla minung an thah hna tikah dantat an tong bal lo a ti.
An tlaihhrem hna tikah kan duh lo ti chim zong an onh hna lo. Ka duh lo timi chimnak nawl hrimhrim zong an pe hna lo. Nau an pawi sual ahcun nau an hrawhter hna. An thih hnu hmanh ah minung an sinak an theih pi duh hna lo. Minung lo bantukin tuahto an si a ti. An ruak hi an pumh hna. Zarh khat hrawng a rauh in an khangh hna.
Lim cu South Korea ah a um cang. An kan hruaitu nih an kan hlen dih cikcek. Thongtla cu minung ah nan ruat hna lai lo a kan ti. Atu ka ruah ah hin a celh in ka celh lo. Ralkap hmaiah taklawng in an rak certer hna hnuah a rak zam khomi a si. Ref: The Express.