Video thar a chuak thanmi nih United Airline mual a phoh than. Hramhram in Dr. David Dao an chuah i an buai hnu lawngah an chuahtermi minung pathum zong tangka an liamh than hna. Dr. David Dao nih bia hrang le bia thalo a hmang lo. Namte in a chonh ko hna an ti.
Asinain United Airline chairman Munoz nih cun 'Dr. David Dao nih a hrocer hna i aa chan tuk caah hramhram in an chuahmi a si' a ti. Asinain Video thar an chuakmi nih fiang tein a langhter hnuah Munoz nih ngaihthiam halnak a tuah than. An sipuaizi zong a tla ngaingai manh ti a si.
A chuahtu officer pathum zong an rian in dinhter an si. Video thar an chuahmi ahcun Dr. David Dao zong an nawl lioah cun chuah aa tim ko. Asinain nikhatni hlan chungah a zuang ding dang vanlawng a um lo timi a theih i chuah a duh than lo ti a si.
New Jersey Governor Chris Christie nih 'a hleihluat in tiket zuar hi donghter cang u' a ti. 'Minung pakhat sinah tiket an zuar, a thutnak an chiahpiak, an thutter, cu hnuah vanlawng chungin hramhram in an hnuh than. Thin a khenh tukmi tuahsernak a si' tiah CNN ah fak ngaiin a chim.
Nithumni hnu cun United Airline chairman zong a aw a thumh thluahmah cang. 'Tiket a cawcangmi cungah kan tuah hrimhrim ti lai lo. Hramhram in kan chuah hrimhrim fawn ti hna lai lo' a ti. Dr. David Dao zong Chicago sizung ah a um lio a si. Nilini ah a sihni pa zong mipi hmaiah biachim aa tim.
US Transportation Secretary Elaine Chao sinah Governor Christie nih cakuat a tial. 'A hleiiin tiket lak hi kan donghter ding a si' a ti. A chim thanmi cu 'ni fatin in vanlawng aa citmi an chuahter lengmang hna. Tiket a caw cangmi hna cu ti awk thalo in a herhmi zawn ah dah ti lo cu chuahter than si ti hna hlah seh' a ti.
Tiket a caw cangmi chuahter i vanlawng chung riantuantu thutter ti bantuk zong um ti hlah seh. tiah a chim chih. Ref: CNN News.