Vanuatu i Ambrym Island ah meitlang a rak puah i British scientist Geoff Mackley le Bradley Ambrose nih an lehlanak video zoh hi tih a nung hringhran ko. Anmah hrimhrim an raltha i upat tlak taktak an si. Tlaang cungin a chunglei zohnak hmanh in thling a za cang.
Theihhngalhnak hmuhnak caah cun nunnak pek ngam zong a rak herh i ralthat hrimhrim zong a rak herh ko. Vawleicung ah a thuh - a sannak tiang in theihhngalhnak kan rak ngeih khawhmi hi hi bantuk minung hna ralthatnak le pumpeknak thawng in a rak si ko.
Marum Volcano a rak puah hi vawleicung ah a min a rak thang tukmi a si. Meitlaang zong a puah lengmangnak hmun a si. Minung khuasahnak zong a rem lo. Geoff Mackley le Bradley Ambrose nih an chimmi cu 'kanmah hi a phan hmasa cem kan si' an ti.
Tlaang ngan taktak khi a si i, meithlangpuahnak nih a chimh i a hrawh dih cikcek. Tlaang cungin a puahnak zoh khin cu a tanglei pi ah khin a va si. A tanglei ah khin mei tiva cu a tlok in an tlok. A chunglei ah tum ding zong in a tihnung kho tuk, asinain hri in an i thlai i an va tum. Tlangval zong an si lo. Upa lei an si cang.
A tlok in a tlok cuahmahmi mei tlaang cung an dir lio hrimhrim cu thling a za i tihnung kho tuk. Asinain an i zuamnak le an nunnak an thapmi upat tlak taktak an si. 'Mei tlaang ah hin secont 6 te lawng kan dir kho. Asinain thuam kan i hruk hnu cun minute 40 leng kan dir kho cang' tiah an chim.