Syria i Idilb khuami sivaidat in an kah lio hna ah US sungthoh bu nih Syrian ralkap le sivaidat expert biaruahnak kan theih hna tiah US senior official nih CNN ah a chim. A biaruahnak kan theihmi hna cu sivaidat an kah khawh ah kan kherhlai colh i Syria President Assad a si ko timi kan theih.
Sivaidat in an kah hna lai timi hi a hlan in kan thei lo. Syria a siah Iraq a siah a dangdang a siah an i chonhbiaknak a tam tuk tikah thil poipang a can hlanah cun kan kherhlai tuk lem hna lo. Asinain thawngpang kan theih cangka in kan kherhlai i Syria ralkap an si ko timi kan theih tiah a chim chih.
Asinain Syrian ralkap he bia aa ruahmi chemical expert hi ahoset an si kan thei hna lo. Russia an si lai tiah fiang tein kan chim kho lo. Russia hi thlithup thil tuah leiah cun aa ralring tukmi an si i, an biaruahnak theih zong hi a har ngai. Chemical expert hi ahodah an si timi kan kherhlai chuahmah lio a si.
2013 ah Syrian ralkap nih sivaidat an rak hman i minung zong an rak thi len cang. Mah hnu in hman ti lo ding tiah fak tuk in an rak horcer cang hna. A rak bawmtu hna hi Russia expert an si. Atu zong Russian expert nih an bawmh ko hna lai timi zumhnak kan ngei. Syria nih chemical expert an ngei lo. Russia hi a ngeimi an si.
US Official nih a chim thanmi cu atu cun US nih kan ruahmi cu Russia nih Syria a dirkamhmi hi donghter cang seh kan ti tiah a chim. Sivaidat an kah lioah khan Russia drone zong sivaidat a ingmi sizung cungah a rak zuang. Russia drone a si ko tiah kan sungthoh bu nih an chim a ti. Ref: CNN News.