Campaign a tuah lioah NATO hi kan herh ti lo. Nihin kan chan caah santlaihnak an ngei ti lo. An hlun cang. NATO caah tangka kan hmanmi zong santlaihnak an ngei ti lo. Tamtuk kan dih. NATO ram hna caah vanlawng tiket a cawkpiak men bantuk kan si tiah fak ngaiin a rak chim.
NATO ram pawl zong an rak lau i, President a tlin taktak ahcun NATO hi kan kuai te ko lai lo maw tiah an ruah. Russia tu hi a hawi ah a tlaih te hna lai i zungzal an hawi NATO ram tu hna hi a kan hlawt te ko lai lo maw tiah thinphang in a rak chiah hna.
Asinain President a tlin hnuah cun campaign lioah a rak chimmi vialte aa tleng thluahmah cang hna. Hruaitu si hlanah cun ruah ning aa dang i hruaitu kedan vun i danh taktak hnuah cun thil biatak theih a vun si i, ruah ning le hmuh ning zong aa thleng lengmang tawn. Atu cun Syria a hmuh ning zong aa dang.
Russia a hmuh ning zong aa dang i, NATO ram a hmuh ning zong aa dang cang. NATO Secretary General Jens Stoltenberg he tonnak an ngeih lioah President Trump nih a chimmi cu 'Jens Stoltenberg he biaruahnak tha tuk kan ngei. ISIS tapung dohnak kong kan ceih i, NATO nih zeitluk in dah rian an tuan timi ka vun theih chin lengmang.
Campaign ka tuah lioah cun NATO ka rak zai hnawh hna. An hlun cang. Santlaihnak an ngei ti lo tiah ka rak ti hna. Asinain atu cun a hlunmi an si lo. Kaa thleng cang' tiah a chim. A chim lengmangmi NATO nih tam deuh in tangka tho u a timi cu a nolh than rih.
Tu zarh chungah Montenegro zong NATO chungtel an si cang. Mr Stoltenberg tonnak cu tlamtling tein an lim. Lunglawmhnak zong a chim i, thil tha tuk kan chuah pi tiah a chim. Tonnak an ngeih hi Russia President Putin le Secretary of State Rex Tillerson tonnak an ngeih hnuah a si.
Trump nih a chimmi cu 'atu cun Russia he kan kal ti kho ti lai lo. Russia he kan i pehtlaihnak ah a chiah bik zong kan si kho men te lai' tiah Trump nih a chim chih. Ref: BBC News.