Taiwan cozah nih uico le chizawh thah a khapmi cu teinak nganpi a si tiah an ruah. Saram rungvengtu bu lei hrimhrim in an lungtling i, an thangthat tuk hna. Asia ram hi uico le chizaw thah kongah a min chia zungzalmi a si. Market kip ah uico le chizaw an zuarmi hna hrimhrim hi zoh ah celh an si lo.
Taiwan nih tuan deuh ah phung an ngeihmi cu chizawh le uico thah lo ding le an sa zong zuar lo ding ti a si, asinain nihnihni i an phung an remh thanmi ahcun an sa zong ei ti lo ding ti a si tiah Animals Asia Foundation dirhtu Jill Robinson nih a chim. 'Thancho taktak a si' a ti.
Uico a siah chizaw a siah a that i an sa a eimi paoh cu $1,640 in $8,200 karlak dantat an si lai. Motor in a siah motorcycles in a siah uico a hruaimi hrimhrim hna cu fak deuh chinchin in dantat an si lai. Saram cungah dawtnak a ngei lo i a hrangmi hna cu kum hnih thongthlak an si lai.
Timhciammam tein saram a khawng dengmi cu $65,500 dantat an si lai. Hi dantatnak ah aa telmi hna cu saram kut le ke a khiakmi, cawlcangh kho loin a tuahmi le thi lak in a khawngdengmi an si lai. An min, an hmanthlak, an sualnak vialte mipi hmuh ah tarlangh an si fawn lai.
Ni kum ah fak tuk in mipi thin a rak hung cang. Ralkap nih uico an rak thah i video in an rak langhter. Uico cu a hngawng an dih i rili cungah a pum cu an rak tlai len. Mipi nih an hmuh i an thinhung kho tuk cang. Taiwan Defence Minister nih mipi sinah ngaihthiam halnak bia a rak chim.
Uico sa hi Taluk zong nih an ei, Phillippines zong nih an ei, Korea zong an ei, Indonesia zong nih an ei. Taiwan nih upadi thar a sermi nih tam tuk bia a chimh hna lai an ti. Taluk zong hi fak tuk in an soisel lengmangmi a si. Ref: CNN News.