Syria Airport pawngah fak taktak bom a puak. Israel an si tiah Syria nih an kutdong in an sawh colh hna. Asinain Israel nih kanmah kan si ti zong an chim lo; kan si lo ti zong an chim lo. Israel cozah minister pakhat nih a chimmi cu 'bom a puakmi le Israel policy hi zoh chih ahcun Israel puh khawh an si ko' a ti.
Lebanon hmunkhur Hezbollah raltho hi Syria in hriamnam a phiar lengmangmi an si. Syria nih hriamnam an pek hna i Lebanon in Israel an rak doh lengmang hna tikah Israel nih an hriamnam an phomhpiak lengmang hna.
Bompuahnak hmun pawngah a ummi nih an chimmi cu 'Syria khuapi Airport pawngah bom a puah thawng kan theih. A puah thawng a thawng kho tuk. Damascus khuapi hmun kip in an rak theih dih' tiah Rami Abdulrahman nih a chim. Mei zong an kaang i zeiruangah dah a puah timi kan thei rih lo' a ti.
Israel sungthoh lei upa Katz nih a chimmi cu Israel zong an si kho men ko. Syria hi thlithup in tapung sinah hriamnam a pe lengmangmi a si caah Israel nih an kah khawhmi a si ko. Israel nih tapung sinah hriamnam pek cu an duh lomi a si. An kah lengmang ko hna lai tiah a chim.
CNN biahaltu nih a hal chihmi cu 'Israel nih kan kahmi hna an si ko na ti duhnak a si maw?' tiah a hal. Katz nih a lehmi cu 'ka chim lo cuh. Ka chimmi cu ka chimmi a si ko' tiah a leh. Hezbollah raltho hi Lebanon ah political party zong in a dirmi an si. Iran nih tangka in a bawmh hna i Syria nih hriamnam in a bawmh lengmang hna.
Israel le Lebanon ramri kongah Israel he a buai pengmi an si. Syria ramchung buainak zong ah President Assad ral a tuk pimi an si. April thla thawh kaa hrawngah khan Prime Minister Netanyahu nih cun 'voi tam ngai Syria kan kah cang' tiah a chim. Ref: CNN News.