US nih South Korea ah THAAD missile a chiahmi a let lo ahcun kan ralkap eksaisai tuah kan ngol lai lo tiah ralkap upa nih US a hro ve cang hna. North Korea le US hrocernak chungah an holh tuk lo. North Korea tu ralrinnak an pek. Asinain atu cun Taluk tu a linsa than cang.
President Trump nih atu le atu in Taluk cu North Korea chak rengh ding in a auh lengmang. Asinain THAAD missile kongah Taluk zainak vialte US nih aa theihter lo. Tuan deuh ah Taluk ralkap bawi defence ministry biachimtu Yang Yujan nih a chimmi cu 'THAAD ruangah an man an liam te lai' a rak ti.
Atu zong kan ralkap eksaisai tuah kan ngol lai lo a ti. South Korea in an missile hi la than hna seh tiah fak ngaiin an au cang. Taluk nih South Korea ah THAAD missile chiah hi an duh lo tukmi a si. Asia ram uk a kan timh bantuk a si tiah Taluk nih an hmuh.
Asinain South Korea le US nih cun 'North Korea missile le nuclear runvennak caah kan chiahmi a si' an ti. 'South Korea ah missile system sang taktakmi THAAD an chiahmi nih pawngkam ram a hnuarsuan lai i kan dai thiam lai lo' tiah Taluk defence ministry biachimtu Yang Yujun nih a chim.
'Kan ram himnak le kan daihnak ding caah cun ralkap eksaisai tuah zong kan ngol lai lo; kan hriamnam thar pawl zong kan hneksak hna lai' tiah a chim chih. Ref: The Express.