Myanmar Institute of Theology ah Principal a tuan cuahmahmi Rev. Dr. Samuel Ngun Ling nih laam le Hallelujah kong a chim mi bia nih Laimi pakhat le pakhat karlak ah biaalnak fak ngaiin a chuahter. Phillip Pa nih facebook ah a rak tial i, comment petu zong an tam.
Phillip Pa nih Dr. Samuel Ngun Ling chimmi bia cu a tanglei bantukin hitihin a tial:
Baptist Khrihfabu cu minung nih dirhmi a si loh. Jesuh nih a dirhmi Khrihfabu a si. Baptist cu kan laam loh, Hallelujah le Amen kan hmang tuk loh. Kan laam lonak ruang le Hallelujah/Amen kan uar lonak ruang cu Jesuh le Lamkaltu nih khan an rak hman tuk lo caah si. Kan chim cang bantukin Baptist a dirhtu cu "Jesuh" a si bantukin Jesuh hrimhrim nih a hman tuk lomi si caah Baptist zong nih kan hman tuk ve lonak si.
Lamkaltu pawl zong nih Laam, Hallelujah/Amen hi an rak hmang tuk ve loh. Amen an rak hman ning hna cu "Thlacam" donghnak lawng ah an rak hmanmi si. Cucaah Baptist Khrihfabu cu "Ning cang te le Dawh cah tein" Pathian thangthat hi a kal ning a si. Ningcang lo le Dawhcah loin Pathian biak cu Pathian hrim nih a duh lomi si.
1 Korin 14:33 'zeicahtiah Pathian nih a kan auh cu ningcang lo piin um awkah si loin daite le rem tein um awk tu ah a si.'
-----------
Comment peknak (TCP): Laimi hi Baptist le Evangelical in kan um taktak cang. A tlangpi in Baptist hi piangthar lo ah kan ruah hna i 'Amen,' 'Hallelujah' a ti deuh paoh kha a piangthar (evangelical) deuh ah kan ruah cang hna. 'Amen,' le 'Hallelujah' nih Laimi biaknak hi a kan then chin lengmang cang. Kan sumh tahnak zong ah kan hman cang.
'Amen,' le 'Hallelujah' timi biafang hna hi kan piantharnak le pianthar lonak sumh tahnak ah hmanh awk an tha maw? Hi bia a chimmi hna lawng maw piangthar ah kan ruah hna lai i, a chim lo paoh hi piangthar lo ah kan ruah hna lai?
Kan ruah ding an si lo. 'Amen,' le 'Hallelujah' biafang in kan sumh kan i thah ahcun kan palh lai.
'Amen,' le 'Hallelujah' kan timi nih kan khamhnak cungah lai a rel lo i, kan pianthar le thar lo cungah lai a rel lo. 'Amen' a ti kho ngaimi nu/pa zong a chung in a rak piangthar lo kho men ko; 'Amen' a ti bal lo pa zong a chungin a rak piangthar khomi a si ko. 'Amen' a ti kho ngaimi nu pakhat cu 'a chungkhar ah a biachim a chia i a puarhraang i phunzai le thangchiat lawng te a rian. Asinain biakinn ahcun 'Amen' loin a um kho lo.
'Amen' a ti bal tuk lomi nu cu a inn chungkhar caah zohchun awk in a um i, a fale ca le a pasal ca zong ah bochanmi nu a si ko. Zeiruangah dah a nun aa dawh? Jesuh Khrih a zumhnak ruangah a si ko. Jesuh Khrih zumhnak nih a sermi kan nunnak aa dawh le dawh hi a biapimi a si. 'Amen' kan timi nih kan nun a dawhter tung lo ahcun 'Amen' hi santlai lo a si.
Cheukhat cu 'Amen' tinak hmun (Khrihfabu) ah an um ruangah an chim lengmang i an ziaza ah a tla. Chim loin an um kho ti lo. An pianthar lem lo zong ah 'Amen' an ti lengmang ve cang. A hnuah cun piangthar tiang ah an i ruat sual. Asinain an nunnak ahcun thlennak a rak um lo hlah maw ti awk in a um thiamthiam.
Cucaah 'Amen' biafang in pakhat le pakhat kan sumh kan i tah ding a si lo.
Cun cheukhat cu 'Amen,' le 'Hallujah' nun an ngei i, an thazaang ngai ah an hman khawh i an caah an thahnem tuk. 'Amen,' le Hallujah' biafang hi an nun le zumhnak cawmtu ah an hman. An umnak kip a lum i an i hliphlau deuh. Cucaah 'Amen' kan timi nih thathnemnak a kan pek ahcun kan tuah ding a si ko. Kan doh i kan 'uar lo' kan ti ding a si lo.