Laimi hlasak thiam an tam chin lengmang cang. An min kan theihmi hna chung hmanh in biatak tein rel phu an si cang. Kan theih rih lomi hlasak thiam thangthar zong zeizat dah an um rih lai timi kan thei rih hna lo. Laimi hlasak thiam kong le dirhmun lam kip in zoh caan an za ngai cang.
Laimi kan hlasak thiam kong tete tial ding an um len cang. Dirhmun an ngei cio. Pathian hla an sakmi chungin a siah love song an sakmi chungin a siah anmah le dirhmun cio in style (umtu ning) an langhter cio hna. Hi chungah pakhat langhter duhmi cu kan Lai muidawh hlasak thiam Van Dawt Chin (Moe Moe) kong hi a si.
Van Dawt Chin hi Laimi hlasak thiamnak a cawisang tuk pakhat kan ngeihmi a si. Laimi chung zong in uartu (fan) tampi a ngei. Pathian hla zong a sa i, love song zong a sami a si. Laimi huap lawng si loin kawlram pumpi huap in hlasak leiah minthang pakhat kan ngeihmi zong a si. A hleiin Laimi sinah zohchun ding tampi a sertu nu saltha pakhat zong a si.
Van Dawt Chin hi Lai Tlang ah a thangmi a si lo bantukin dirhmun phundang te a ngeimi a si. Cu nih cun Laimi hlasak thiam hna lakah a sexy bikmi hlasak thiam ah a ser tiah kan ruah. Kawlram chung i concert an ngeihnak tete zoh tikah a hlasakmi hoih in thilpuan zong aa hruk thiam i, cawlcang a thiammi zong a si.
A hmun le a caan hoih in um a thiam kan ti lai. Hika i concert an ngeinak i hla a saknak cu a sexy ngai. Al awk a um lo. Laimi hlasak thiam hna hi sexy ngaiin mipi hmaiah an um ngam tuk lo. An ralchiat maw a si? An ningzah maw a si? Kan thei lo. Asinain kahin a chiahnak in a siah a thatnak in a siah Van Dawt Chin zohchun phun a si.
Laimi hlasak thiam dangdang zong hlasak thiam pakhat dirhmun in umtu ning an ngei cio hna. An umtu (style) hi hlasak thiam an sinak thazaang taktak a si.