Syria nih mipi cungah sivaidat a hman ruangah G7 an thinhung tuk. Nikhatni ah Italy ah tonnak an ngei i Russia le Syria kong an ceih. G7 cu Canada, France, Germany, Italy, Japan, UK, le US hna an si i, nikhatni tonnak ahcun European Union upa zong an i tel.
Italy khua Lucca ah tonnak an ngei hna i nihnihni zong an peh rih lai. Asinain nihnihni ah Secretary of State Rex Tillerson cu Russia ah a zuang than lai i, Russian Foreign minister Sergei Lavrov he an i tong than lai. A linsami tonnak a si lai tiah zumh cia a si. A biapi tukmi tonnak a si lai.
Russia nih an hngahmi cu Syria kongah US policy hi zeidah a si timi theih an duh lio te a si. US nih Syria kong tampi chim ding an ngei; Russia lei nih zeitin dah an chim ve te lai? Cucaah Syria kong fak piin an ceih than lai. Zalong tuk in Syria sivaidat hmanmi kongah Rex nih Russia zong a mawhchiat len hna.
Sivaidat hman lo ding tiah hnatlaknak kan tuah ko buin Syria a hmantermi cu Russia santlaih lo tuk a si tiah fak ngaiin a mawhchiat hna. Nikhatni i G7 an i tonnak zong Russia le Syria kong biatak tein an ceih. Syria he naa hlat a hau cang kan ti lai an ti. Cun Syria kongah zeitin dah na hmuh ning a si tiah US zong kan hal lai an ti.
UK Foreign Secretary Boris Johnson nih a chimmi cu 'Syria cozah a dir pimi kongah Russia nih biatak a ton awk a si cang. Syria hi a kal tak duh lo cun a thar in dan kan tat lai' tiah a chim. Ukraine in Crimea an rak lak ah khan US le EU nih dan an tat cang. Atu zong G7 nih zeitin dah bia an fun ning a si te lai.
Russia le Iran nih cun 'US nih Syria a kah than ahcun 'red line' a tan cang tinak a si lai i, kan lehrul cang lai' tiah an hrocer ve. 'Atu ni thok cun hramhram in namneh a hmangmi cu kan thazaang in kan lehrul cang hna lai. Zeitluk in dah kan lehrul khawh lai timi America nih an theih' tiah biatung an chuah. Ref: BBC.