Pathian lamkaltu ka si aa timi Clairvoyant Horacio Villegas nih vawleicung ah thil cang ding tete a rak chimmi hi an hman lengmang hna an ti. Atu zong ralpi pathumnak a ra than lai tiah a phuan i mi tampi cu lungrethei le thinphang in an um hna. A rak phuanmi chungah a tlingmi tete an um tikah tutan a phuanmi zong zoh phu a si ko.
Amah hrimhrim nih a chimmi cu 'thla 15 hlan hrimhrim in Trump president a si lai tiah ka rak phuan i ahohmanh nih an zum lo. Asinain a tlin hnu lawngah an zumh. A hlan zong ah ka rak chimmi tete hi an zum hna lo; an tlin hnu lawng ah an zumh hna' tiah a chim.
2015 ah khan US President a tling dingmi cu Donald Trump a si lai tiah a rak phuan. President a tling lai i, vawleicung hi ralpi pathumnak a chuahter lai tiah an rak phuan chih. President aa cuh lio dirhmun zoh tikah President a tlinnak ding lam a rak har i Pi Clinton nih a tei te ko lai tiah zumh a si, asinain ruah lo piin teinak a hmuh diam.
Clairvoyant Horacio Villegas nih a phuan thanmi cu Syria a kah lai i Russia, North Korea le Taluk zong an i thlak te lai tiah an rak chim chih. Mang a rak manh thanmi cu 'vancung in mei bawlung a rak tlak ka hmuh i vawlei cungah a tla' a rak ti. 'Hmun kip ah mi vialte cu zamnak le thuhnak lawng te an kawl hna. Nuclear raltuknak a si te ko lai' tiah ka zumh a ti.
A chim thanmi cu May 13 ah a cang te lai tiah a chim. Nu thiang Mary, Jesuh a nu nih Fatima khua a rak len a kum 100 tlinnak ni ah a si lai i, cu ni cu May 13 hi a si. October 13, 1917 ah a rak len cang i, May 13 hi a kum 100 tlinnak a si a ti. Voiruk a rak lennak i a donghnak cu 1917 ah hin a si.
Catholic zumhnak ahcun Mary nih Portugal khua a rak len hna i Russia hi zumhnak ah nan thlen khawh hna lo ahcun Pathian nih vawleicung ah buainak a tlunter lai tiah ralrinnak a chim. Ralrinnak a chimmi cu 'Russia hi aa thlen lo ahcun vawleicung Khrihfanu a hremtu a si lai; minung a thah hna lai i ram tam tuk a hrawh hna lai' a rak ti.
Prohphet Villegas nih a chimmi cu May 13 in ralpi pathumnak aa thok lai i October thla ah a dong te lai tiah a chim chih. Mipi nih an i ralrin dingmi caan cu May 13 in October 13 karlak hi a si lai. Hi chungah thihnak, hrawhhralnak le khuaruahar thil tam tuk a tlung lai a ti. Ref: Daily Mail.
(Note: a cung kan tialmi hi a hmaan tiah kan zumh ruangah si loin social medai kip ah an tial ciomi a si caah mipi theihtlei ah kan rak tialmi a si. Na zumh le zumh lo cu nangmah pumpak cungah i hngat seh!).