Ralpi Pathumnak a tho sual lai tiah an thinphan cuahmah lioah Taluk raltuknak tilawng nih a missile cu North Korea rili ah a kah thluahmah hna. North Korea hawi tha zungzal a simi Taluk nih zeiruangah dah hi bantuk thil a tuah? North Korea a hrocernak maw a si?
Syria, Russia, North Korea le US karlak ah ral a tho sual te lai maw tiah an zoh cuahmah lioah North Korea he zeitik caan paoh ah ral kan tho kho men tiah Taluk official nih an chim an ti. North Korea rili ah Taluk zeidah a tuah timi theih a si lo. North Korea ramri ah Taluk nih a ralkap zong a thlah chin lengmang hna.
Taluk raltuknak tilawng Xining nih Yellow Rili ah a hriamnam zong a hneksak len hna. Hihi Taluk le North Korea karlak rili a si. Raltuknak tilawng cungah ralkap nih Yellow rili cungah missile an kak len lio video zong an lang. Raltuknak chuak sual seh law tiah eksaisai an tuahnak zong an lang hna.
Taluk raltuknak tilawng hi January ah voikhat a rak lang. Raltuknak vanlawng kahnak le rili cung kahnak hriamnam zong an ngei i, an thazaang zong an rak langhter len. Hi bantukin linhsatnak a um lioah Taluk nih a raltuknak tilawng thazaang a rak langhtermi hi thil pakhatkhat cu a si ko lai tiah an zumh.
North Korea nih missile a hneksak lengmang ruangah US nih Syria a kah cangka in a raltuknak tilawng phu hna cu North Korea leiah a rak thlah hna. North Korea thihpheihnak a tuahmi a si an ti lioah North Korea nih nuclear hriamnam in a hrocer lehlam hna. US nih North Korea hi na rengh lai a ti i, Taluk cawlcangh an zoh cuahmah lio a si. Ref: Daily Star.