South Korea le North Korea nih ralkap ramri an ser i kap hnih ralkap nih i tonghpiak veve lo ding an timi hmun ah Vice President Mike Pence a leng. Fak ngaiin North Korea hrocernak bia a chim. 'Kan ralkap thazaang zong kan hneksak hlah u; US zong kan hneksak hlah u' tiah a chim.
Norh Korea nih UN ah an rak thlahmi Deputy representative Kim In Ryong nih fak ngaiin a vun leh colh than. Syria a kahnak le Korea rili ah a raltuknak tilawng a rak thlahmi zong kan duh lo. US cawlcangh hi a tihnung tukmi hmun a phan cang; zeitik paoh ah nuclear ral a thawhter khotu an si' a ti.
UN i North Korea press conference ah a chim thanmi cu 'US hi vawleicung daihnak le himnak caah tihnung le buainak sertu an si' tiah a chim chih. Nikhatni i Kim In Ryong hrocernak biachim cu a sawhsawh a si ti lo tiah mi tampi an hmuh cang.
'Mi ramdang tuk ding le lak ding in timhnak a ngeih pengmi hi a donghnak taktak i a duhnak a si. Kan ram zong timh cia a si cang. US nih a kan kah ahcun zeitik paoh ah lehrul ding in timh cia kan si cang. Nuclear in an kan kah zong ah missile in a kan kah zong ah a kan kah bantukin kan lehrul ve hna lai' tiah UN i North Korea press conference ah a chim.
'Korea rili ah US nih a raltuknak tilawng a rak thlahmi hrimhrim hi a tihnung tukmi hmun ah a phan cang. Tuk a kan duhnak daithlaang tuk in a langhtermi a si ko tiah fiang tein kan hmuh. Tihnung tiang in dirhmun kan phanh ahcun US cawlcanghnak thalo ruangah a si lai' tiah a chim chih.
UN zong an lungrethei cang. UN lei biachimtu Stephane Dujarric nih a chimmi cu 'Korea ram hrawngah entainak a tho chin lengmangmi nih lungrethei in an kan tuah cang. A lethnih in kan i zuam than a hau' tiah a chim. Ref: CNN News.