Nirukni ah CBS News nih President Trump biaruahnak an tuah i North Korea missile kong an hal. North Korea nih missile a hneksak i a tlolh ni bak ah khan a si. John Dickerson nih a halmi cu 'North Korea hi ralkap in tlangtlak a hau tiah na ruat maw?' a ti.
President Trump nih a lehmi cu 'ka thei rih lo. Ka chim duhmi cu, kan zoh rih lai. A rauh hlanah nan hmuh te lai cu, a si ko lo maw?' tiah a leh. John Dickerson nih aa lunghmui lo i President Trump cu a hal chih than. 'Nan hmuh colh te ko lai' tiah a leh than.
Nirukni i North Korea nih missile a hneksakmi cu a tlolh than diam. North Korea caah cun ningzak ngai a si cang. An hruaitu Kim Jong-un hi thinhung le ingpuan in caan zong rak hmang len cang seh law kan thei lo. A scientist pawl le a ralkap bawi pawl zong zeimaw tiin rak tuah cang hna seh kan thei lo.
Asinain North Korea cawlcangh thalo nih US pi cu a thinhunter chin lengmang cang. UN Security Council ah Secretary fo State Rex Tillerson nih fiang tuk in a chim cang. 'A nuclear le mssile program a ngo lo ahcun' tiah a hrocer cang hna.
President Trump nih cun 'North Korea nih Taluk duhnak le Taluk President Xi a upat lo bia a si. A hneksakmi missile a hlawhtling lo nain a hneksak lengmangmi cu a tha lo taktakmi a si' tiah twitter ah tial.
Norh Korea nih a hneksakmi cu US zeirel lonak a langhternak a rak si ve. Japan le South Korea zong an thinhung kho tuk cang. An pahnih in an rak mawhchiat colh. Ref: CNN News.