Zahan zarh nilini le ningani ah Taluk President le US Presiddent Trump tonnak an ngei. North Korea kong ceihnak an ngeih hnuah tu ni nithumni ah phone in North Korea kong an ceih than. North Korea chak rengh deuh a herhnak kong an ceih than.
2016 hnu in cun North Korea hi missile le nuclear kongah a lungkhong chin lengmang cang. Atu le atu ti awk in a missile le a nuclear a hneksak lengmang. Dantat len zong ah a chei ti hna lo. US zong lungrethei in a chiah lengmang. Taluk zong North Korea hi na cawnpiak deuh a hau an ti lengmang.
US in Taluk President Xi a kir hnuah President Trump nih twitter in 'Taluk nih North Korea hi a chak tha tein a rengh khawh lo ahcun kanmah nih kan rengh cang lai' tiah a tial. Trump nih a chim thanmi cu 'North Korea chak hi na rengh khawh ahcun kan ram pahnih chawlehthalnak zong a let in a tha lai ka ti' tiah a chim.
A chim thanmi cu 'North Korea hi buainak ser awk a kawl lengmang. Taluk nih na kan bawmh ahcun a tha tuk lai. Na kan bawmh lo ahcun Taluk tel loin kanmah nih kan rengh cang lai' tiah a chim chih. Nithumni phone an i chonhmi hi President Trump nih twitter in hrocernak ca a tial hnuah a si.
Taluk Foreign Ministry leiin an chimmi cu 'President Xi nih 'North Korea hi nuclear ngeih loter kan duh ko hna. Daihnak le fehfuannak kan kawl ko lai. North Korea kongah US he a thatnak tein rian kan tuan ko lai. Daihnak he thatnak kawl hi kan duhmi a si ko' tiah Xi nih a chim an ti.
Zahan zarh i US, Florida an i ton ah khan President Trump nih Syria a kahnak kong a chimh lioah Xi nih a lehmi cu 'Sivaidat hman cu cohlan awk a tha lomi a si' tiah a leh. Hruaitu pahnih tonnak an ngeih hnuah North Korea nih nuclear in US a hrocer than hna.
Raltuk ding in timh cia kan si. Nan ralkap umnak kip ah nuclear in kan in kah hna lai an ti. US leiin lehrulnak a um rih lo. Taluk le US karlak chonhbiaknak thawngpang fiang a langh rih lo caah zei tiang dah North Korea kongah US nih policy a ser cang timi a lang rih lo.
Syria a kah hnuah a raltuknak tilawng phu cu North Korea leiah a rak thlah cang. Russia nih cun North Korea a kah than te men lai tiah ralrinnak a chim. Ref: CNN News.