Russia raltuknakl tank le ralkap hna cu North Korea ramri leiah an pok thluahmah hna. US le North Korea karlak entainak a linhsat tuk lioah Russia nih a ralkap le a tank a thlahmi hna cu North Korea thazaang bantuk a si an ti.
UN nih North Korea missile hneksaknak mawhchiat ding le hmailei ah missile hneksakter ti lo ding in kan kham lai an timi zong Veto power in a kham diam hna. Atu zong a ramri ah a tank le a ralkap a thlah thluahmah than hna. Ralkap thilri zong khat phikphek tein tlanglawng nih a phurh i a kal an ti.
Ramri hrawngah raltuknak tank le ralkap an i chawh cuahmah lioah cunglei in helicopter zong a zuang len. Russia leiin zeidah an tuahmi a si timi fianternak an tuah lo. North Korea le US karlak ah thil pipa a chuah ahcun cawlcangh colh ding phun in an um tiah an chim.
Raltuknak a chuah ahcun refugee tam tuk an um lai. Taluk zong ah an lut lai; South Korea zong ah an lut lai i, Russia zong ah an lut lai tiah zumh a si. 'Russian lei upa pakhat nih a chimmi cu 'ralrin lak chungnak a si. North Korea buainak a ser thanmi hi aho paoh nih siaherh lo awk a tha lo' tiah a chim.
US nih North Korea nuclear hmun hi a kah ahcu a khuvai nih rau lo ah Vladivostok a phanh colh lai. Russia ah refugee a rak zam ding hrimhrim hi an tam tuk lai tiah Russian Far Eastern Institute i Professor Asmolov nih a chim. Taluk zong a ramri a vunven cuahmah lio a si. Ref: the sun.