Syria ramchung buainak kum ruk chungah US nih nizan niganni ah fak taktak in a voikhatnak a vun hro. 'Red Line' nan tan cang. An lem tuk cang hna tiah President Trump nih a vun khok hna. Syria nih sivaidat an hmanmi hi President Trump an hneksaknak taktak a si tiah Britsh Defence Secretary Micheal Fallon nih cun a chim.
'Asinain President Trump cozah nih cipkhap ti loin an phomh colh hna. Sivaidat hriamnam hrimhrim hman a ngah lo tiah fiang tein an langhter colh' tiah a chim chih. 2014 ah ISIS an rak tho i, US caah thil pahnih a um. Syrian President Assad zong thlak an duh i ISIS zong an doh hna. Syria zong dohtu party he an buai i ramchung buainak nih a zelh in a zelh lio hna a rak si.
2013 ah khan Syrian President Assad nih sivaidat an rak hman than i, President thing Obama nih zeihmanh a rak tuah lo. Cuticun an kut ah hnawm um lo bantukin an ngeihthiam hna. Trump nih Obama a rak timi cu Syria cozah he tang u law ISIS hi doh u a rak ti. Campaign lio zong Syria he ISIS kan doh awk a si rak ti.
Asinain nizan nihnihni ahcun thil sining aa thleng dih. Sivaidat nih minung 80 leng a thah hna. Hngakchia 26 an thi. 'Syria kongah ka hmuh ning aa thleng tuk cang' tiah President Trump nih a chim. Inn Raang Rose Dum ah Jordan siangpahrang Abduhllah he an dir i President Trump cu a thinhun in a ther thluahmah. Abdullah nih a rak tlawn lio celngel a si ve.
'Sualnak ngei lomi hngakchia, nu le pa, bawhte zong an thi hna. An thih hmanh thih colh loin duhsak tein tuar buin an thi. Tihnung tukmi thih a si' tiah thinhung taktak in a chim. 'Sivaidat an hmanmi lehrul hi ka rian a si. Hi tuanvo hi ka lak lai i phorhlawt pi awktlak in ka tuan lai' tiah a chim chih. A tuan deuh te tiang ah khan cun Assad si loin ISIS tu hi kan ral hna lai a ti.
Asinain sivaidat an hman hnu cun 'kan thu sawh ti lai lo, Assad chuahter kan zuam cang lai' tiah US ambassadr Nikki Haley nih a chim ve. Bashar Assad hrimhrim a chuah a hau cang an ti. International community zong nih 'Assad a um chung paoh cu Syria nih hmailei a ngei lo' an ti. Cucaah Syrian cozah thlen khawhnak ding ah kan i zuam a hau tiah UK leiin Fallon nih a chim.
Nizan Assad tuahsernak nih zeitluk in dah political thlennak a upat lo timi a langhter tiah Turkey President biachimtu Ibrahim Kalin nih a chim. France le Germany zong nih uknak thlen a herhnak kong an chim than cang. Asinain Iran le Russia nih fek thuk in an dirkamh ve. Iran nih Syria he riantuan ti i hmailei ah timhnak tampi a ngei; Russia zong nih hmunhma ruah ah thlah a tim ti lo.
Asinain atu dirhmun ning ahcun President Trump nih a zoh kho ti lo. Obama nih a rak tuah ngam lomi a tuah cang. Cawlcangh thiam lo le sual tuk khawh a si ti lomi tiah fiang tuk in a vun langhter. A hleiin sivaidat hrimhrim hmanh khawh a si lo. Kan cohlang kho lai lo tiah a tuahsernak le a biachim in a langhter. Zei tiang dah President Trump nih a tuah ngam rih lai? Ahodah 'Red Line' a tan ngam than lai?