Florida i a pumpak lentecelhnak hmun (club) a tlawnnak hmanh ah $20 million leng a dih cang. President a tuannak in ni 80 hrawng a kal cang. President a tuan kum khatnak i a dihmi le Obama kum riat chung i a khualtlawnnak ah a dihmi he aa tluk te lai tiah an zumh.
President thing Obama hi President a tuan chungah khual a tlawng kho taktak an timi a si. Cun a chungkhar he leng an chuah le khual an tlawn zong a tam. An soisel ngaingai hna. President Trump zong nih 'mipi riantuan awk ngei loin an um lioah na khualtlawnnak ah na hmanmi a tam tuk' tiah a rak soisel len.
2016 Government Accountability Office nih report an rak pekmi cu 2013 ah Florida ah nili chung caam in caan karlak nuamhseih le lentecelh duh ah a rak tlawng. President Trump nih a tuah tawnmi a si. Thlithup congtu le runvengtu an i chiahmi he fonh dih in an dihmi hi $3.6 million a si an ti.
Asinain President Trump cu tam taktak a dih cang. Florida i a pumpak Palm Beach Club ah hin zarh dongh lei deuh paoh ah caan a va hmang lengmang i a dawng tein ni 21 hrawng a si cang. A dawng tein a dihmi tangka hi $ 21.6 million hrawng a si cang an ti.
President thing Obama hi kum riat President a tuan chungah a khualtlawnnak ah a dihmi $97 million naak tlawm a si tiah Judicial Watch nih an chim. Kum khat a tlin ahhin cun Obama kum riat chung a hmanmi hi Trump nih cun kum khat lawng ah a hman lai tiah an zumh.
Kum khat hmanh si loin thla zeimawzat chung hmanh ah Obama kum riat chung hmanmi naak in tam deuh a hman lai tiah an zumh.
New York ah a ummi First Lady Melania Trump runvennak lawng hmanh ah ni khat ah $127,000 in $146,000 a dih an ti. US ramchung rungvengtu hna security hi an rian hmanh kal tak in President chungkhar runvennak ah a changchang in an hman hna tiah sungthoh lei upa nih an chim.
Homeland Security Secretary John Kelly nih a chimmi cu 'President Trump runvennak ah a hleiin fund kan hal chih a hau' tiah a chim. Ref: CNN.