Nikhatni ah North Korea nih US hrocernak bia a chim cang. Syria Airbase a kah hnuah US nih a raltuknak tilawng phu hna cu North Korea leiah a rak thlah hna. Cheukhat nih cun North Korea ralrinpeknak a si tiah an ruah. North Korea nih fak ngaiin an vun hrocer than hna.
'US thlahthlam tuknak cawlcangh hi kan lehrul cang lai. Zei bantuk lam le phung an zulh hmanh ah a herh ning in kan lehrul cang lai' tiah nikhatni ah fak ngaiin hrocernak bia an vun chim cang. Syria a kah hnuah North Korea leiah US nih a raltuknak tilawng phu a vun thlah hna cu ruah ding a tam ngaingai cang.
Norh Korea official nih an chimmi cu 'atu lio US cawlcangh hi kan i runvennak tiin ruah loin nuclear hmanh in a kah kho kan si. A tuahsernak thalo hi kan cawiliamter hna ding an si' tiah an chim. Nihnihni ah Kim Jong-un cu an ramchung tonnak ah a sangbikmi Supreme People's Assembly ah a kai lai.
April 15 ah tleicia Kim II Sung a thih camtuak a si lai. Tuaktan kho nih an chimmi cu 'Kim Jong-un a pu Kim II Sung a thih camtuak ah hin missile maw nuclear dek a hneksak te lai tiah an zumh. A hneksak ahcun US nih fak ngaiin a cawnpiak cang lai ti zong an zumh.
Zahan zarh ningani ah Talu President Xi Jinping le President Trump tonnak an ngei. North Korea kong zong an ceih. North Korea hi nan cawnpiak khawh lo i a chak nan rengh khawh lo ahcun kanmah nih kan tuah lai an ti. Ref: CNN.