2011 ah Syrian cozah pi cu dohtu party le mipi nih fak tuk in an doh i an donghnak ahcun meithal kahnak le ramchung buainak tiang an phan. Mipi cungah a tuahsernak a chiat tuk caah US nih a si khawh chung in a tlangtlak hna. Asinain a ngol hlei lo.
President Obama chan lio a si i, 'red line' a serpiak sek len ve ko nain Obama cu a ralchiat caah Syria cozah nih Obama 'Red Line' zeihmanh a relpiak lo. A duh ning paoh in dohtu party a tlaih hna i a thah hna i, mipi cungah zaangfahnak ngei loin a kah lengmang hna. Syria kongah Obama foreign policy cu sung cikcek in a sung an ti.
US cozah a vun i thleng than i, Syria nih a ziaza a thinh hlei lo. Asinain President Trump nih cun campaign a tuah lio hrimhrim in Syria ramchung buainak kongah kaa thlak lai lo a ti. Mah ruangah cun Syria zong a luarpar a kai kho men. Nizan nihnihni i mipi cungah sivaidat a hmanmi nih zungzal in President Trump policy a thlen dih.
Syria ramchung buainak kong ka hrial lai; kaa thlak lai lo a ti i, ISIS hi kaa hmaithlakmi an si lai a ti. Asinain a donghnak bia hmanung bik a vun chim than cang. President thing Obama 'red line' ka chanhchuah than lai' a ti cang. Aa timh bikmi tu hna tuah loin aa timh bak lomi Syria kongah aa awk cang.
'Atu cun tuanvo ka ngei cang. Hi tuanvo hi kaa tlaih cang lai. Zumh awktlak le phorhlawt pi awktlak tein kaa tlaih cang lai' tiah President Trump nih Syria a kah hlan deuh ah a chim. Syria kah ding in biachahnak a tuah lioah a chim chihmi cu 'US nih sivaidat in mipi kah cu kan cohlan hrimhrim lai lo' a ti.
Syria a kahmi hna cu ruah lo piin hnulei tubakhur in tenglak in thongh bantuk a si. Syria cozah nih aa ruah lo tukmi ah Trump nih a vun phomh hna cu an lau ko lai. US Secretary thing PJ Crowley nih cun 'a pin taktakmi bia cah (strong message) a si' tiah a chim. Ref: BBC.