Nithumni ah UN meeting an thu i US cu an hrang taktak cang. Syrian cozah ralkap sivaidat hmanmi kong fak taktak in an ceih. US ambassador Nikki Haley nih fiang tuk in a chim cang. UN Security Council nih tuanvo a lak lo ahcun Trump cozah nih kan lak cang lai tiah a hro cang hna.
Syrian mipi cungah sivaidat hriamniam (chemical weapon) a hmangtu hi Syrian President Assad ralkap an si ko tiah sual an puh. US, UK le France nih fak taktak in bia an chim cang. Sivaidat hriamnam a hman bantukin dan kan tat lai an ti.
Syrian raltho tapung hmunkhur Idilb khua ah Syrian cozah ralkap nih raltuknak vanlawng in sivaidat an kah hna. Minung 100 leng an thi i, hngakchia 11 an i tel. An thihning zoh ah khuaruahtam ngai an si. A sawm hna. An kaa in buan an chuak. An thaw an chuah kho lo.
Russian Foreign Ministry biachimtu Maria Zakharova nih cun ' Syria ralchanhnak in biachahnak tuah lo ding in UN ah a chim. Russia leiin Deputy UN ambassador Vladimir Safronkov nih Security Council ah a chimmi cu 'atu tiangah Syria kong report an pekmi hi a hman bal lo. Tha tein kan hlat hmasa lai' a ti.
Syria deputy UN ambassador Mounzer nih 'sual an kan puhmi hi a hmaan lo. Mipi cungah hi bantuk hriamnam thalo kan hmang bal lo. Hmailei zong ah kan hmang lai lo' tiah UN ah a chim.
UK leiin Ambassador Matthew Rycrotf nih 'atu tan mipi dohnak hriamnam thalo a hmangmi hi President Assad cozah ralkap an si ko' a ti ve. US, Uk le France nih cun fak tuk in dantat ding in an ruah cuahmah lio a si. Asinain fiang deuh in an hlat lio.
President Trump zong fak ngaiin a thinhung. Ralkap in Syria hi tlangtlak an hau ko lai tiah a ruah cuahmah lio a si tiah Inn Raang chunglei kong a theimi nih an chim cang. Senator John McCain le Lindsey Graham zong nih ralkap kan hman an hau cang tiah an au len cang. Ref: CNN & Metro.