US le North Korea an buai cuahmah lioah Taluk nih US zong fak ngaiin ralrinnak a vun pek cang. Taluk foreign ministry biachimtu Geng Shuang nih 'buainak a ser zungzalmi Terminal High Altitude Area Defense (THAAD) missile' hi kan cohlang kho lai lo a ti.
Norh Korea nih South Korea a kah sual ahcun tiah US nih South Korea ah a rak phurh cang. Asinain Taluk nih a lungrethei tuk ve cang. North Korea nih a kan kah lai tiah US nih North Korea missile le nuclear a kham lengmang bantukin Taluk nih zong a phang ve cang.
South Korea ah THAAD missile an chiah ahcun fawi tein Taluk zong a kan kah khawh i a kan hrocer khawh cang tiah Taluk a hnangam ve ti lo. A hleiin Asia ram cungah US nawlngeihnak a lian chin lengmang lai ti kha a phang. Mah ruangah an rak doh lengmang naak a si.
Daily Press ah Foreign Ministry biachimtu Geng Shuang nih a chimmi cu 'US le South Korea nih buainak ser hi ngol u. Taluk himnak caah ral nan sermi zong ngol u law THAAD missile chiah nan timhmi zong let than u. US ah kir pi than u' tiah fiang ko in a chimh hna.
'Taluk nih kan ram himternak caah cun a herh ning in kan cawlcang lai' tiah a chim chih.
Nithumni ah US raltuknak tilawng le South Korea raltuknak tilawng cu Korea rili ah eksaisai an tuah. An ralkap 2,000 leng an i tel. A hlan deuh ah khan North Korea nih a hriamnam thazaang in a phorzar hnawh ve hna. Taluk media Global Times nih cun 'kir than awk a tha lomi hmun ah an um cang' a ti. Ref: The Express.