Kan hngakchia ralkap nih nuclear bom in US le South Korea ralkap vialte kan in hloh dih hna lai an ti cang. North Korean Youth League hruaitu nih a chimmi cu 'Kan thinhun caan a dongh ni ahcun US hloh ding in North Korea mino pawl timh cia kan si' tiah a chim.
North Korea's state-run Korean Central News Agency ah a chim thanmi cu 'nihsawh awk a tha lomi, zohchok awk zong a tha lomi kan ram cungah sualnak tlunter nan timh lengmang. Nuclear million in kan in hloh dih hna lai. North Korean mino pawl nih zaangfahnak ngei loin kan phomh tak sual hna lai' a ti.
Central Committee of the Kimilsungist-Kimjongilist Youth League leiin a chim thanmi cu 'Kan in phomh ni hna khi cu vawlei tiang in an kekkuai dih lai' tiah an hrocer than hna. Korea hrawnghrang ah US le South Korea raltuknak tilawng eksaisai an ngeih cuahmah lioah an rak chimmi hna an si.
North Korea zong a lung thumh a tim lo. US lei zong an cawlcangh an ngol hlei lo. Zeitik ah dah an i phomh taktak te lai timi lawng cuanh cio an si ko.
Brookings Institution in Senior analyst Jonathan Pollack nih a chimmi cu '1950 hrawng i Korean ral a thawh lioah US nih a rak tlangtlak hna bantuk dirhmun ah kan phan cang. Kan tlu-ril sual tak te lai i, buainak fak tuk kan tong te khomi a si' tiah a chim.
Taluk zong a um thiam ti lo. South Korea ah THAAD missile na let than a hau tiah US cu ralrinnak a pek cang. Taluk nih kan cohlang kho lai lo tiah Taluk Foreign Ministry biachimtu Geng Shuang nih a chim. Norh Korea nih caan tha la in a linhsat than sual ahcun an fawi ti lai lo. Ref: The Express.