US he hrocernak fak ngaiin an ngeih cuahmah lioah kum tin in a tuah tawn bantukin nirukni ah North Korea nih a ralkap le hriamnam thazaang phorzarnak a tuah. North Korea hriamnam thazaang a rak thangchon tuk cang tiah an hmuh. Zarhpini ah a missile a hneksak than.
Tuan deuh ah khan North Korea nih nuclear kan hneksak lai tiah a chim. Pawngkam ram an siah US zong an thinphang. A hneksak ahcun fak tuk in kan lehrul lai an ti. Asinain a ni le caan a phanh taktak tikah a hneksak than lo. Missile fate tu a hneksak than. A lung a thumh ko tiah an hmuh.
Zarhpini (tu ni) ah a hneksakmi cu a thlah cangka in a puak colh tiah US official nih an chim. Zahan thla i a hneksakmi cu Japan rili ah a rak tla. Ni kum April 15, Kim II Sung (a pu) chuahcamtuak ni ah rak hneksak than i a rak tlolh than. A missile tlolh a tam ngai cang.
US official nih an chimmi cu 'April thla ah khan Satellite in Norh Korea cawlcangh kan hmuh cang' an ti. 'Tu zarh a si lo hmanh ah tu thla chungah cun North Korea cungah thil pakhatkhat cu an tuah te lai' tiahNational security adviser Lt. Gen. H.R. McMaster nih a chim.
US Vice President Mike Pence zong South Korea ah a um lio a si. South Korea i an ralkap sinah bia achim. 'South Korean mipi he kan i pehtlaihnak hi a thawng zungzal ko. Pathian bawmhnak le nanmah (ralkap) bawmhnak thawngin Korea ah hin zalonnak kan hmuh te lai ko lai' a ti.
A chim thanmi cu 'North Korea hrocernak le thihpheihnak chungah kan luat caan a phan te ko lai' a ti hna. North Korea hlawhtling lo missile hneksaknak an tuah cangka in South Korea zong National Security Council meeting an ngei colh.
North Korea missile hneksak le thihpheihnak cu fak piin an dohnak an langhter. 'Nuclear a si loah lamhla a kap khomi missile (ICBM) a hneksak ahcun a tuar khawh lo tiang in dantat aa huat cang lai" tiah hrocernak bia an chim. Ref: CNN.