Zarhpini ah North Korea nih a missile a hneksak than i, a tlolh diam. US he fak taktak in an i eitai lioah ka thazaang ka langhter than lai ti lio i a missile tlolh cu North Korea caah ningzak ngaingai ding a si lai. Zeiruangah dah a tlolh timi cu hitihin an zumh i an chim.
British foreign secretary thing Malcolm Rifkind nih a chimmi cu US sungthoh riantuannak a si lai tiah ka zumh a ti. A hlan zong ah US sungthoh nih an rak tuah bal cang. Atu zong an si ko lai tiah a chim. A chim thanmi cu 'North Korea missile a tlolhnak ruang hi President Trump cozah riantuannak a si tiah an zumh cio' a ti.
BBC ah a chimmi cu 'an missile system a chambau ruang zong ah a si kho men, asinain kan zumh bikmi cu US sungthoh nih internet (cyber) thiamnak hmang in an missile system an luh hnawh hna caah an tlolhtermi a si ko. Hi bantukin a hlan zong ah an rak tuah i an missile hlawhtling loin an rak tuah cang hna' tiah a chim.
'North Korea missile a hlawhtlin lo hmanh ah a nuclear hi a tihnung thiamthiam rih. A missile tlolh ruangah kan thathawh tuk ding a si lo. Hlawhtling ngaiin an hneksak lengmang cangmi zong an um. Nuclear program kongah cun a thangcho cangmi ram an si' tiah a chim chih.
US official nih an chimmi cu April thla chungah kan Satellite nih North Korea missile timhtuahnak a rak theih cang. Zarhpini ah a hneksakmi hi lamhla a kap khomi si loin a fa deuhmi missile a si tiah an zumh. Nirukni kha North Korea a rak dirhtu Kim II Sung a chuahcamtuak kum 105 a tlinnak an tuah i ropui taktak in an hriamnam le ralkap thazaang a langhter.
Tutan a hriamnam le thazaang a langhmi nih US a khuaruahharter cang hna. Kan ruahnak leng tiang in a rak thangcho cang an ti. 'Raltuk ding in timh cia kan si cang' tiah Kim Jong-un nih a chim. 'Hi bantuk an missile muisam vialte hmuh ding hi kaa ruah bal lo' tiah California i Professor Dave Schmerler nih a chim. 'Atu ahcun tuang ah a kan chiah cang' tiah a chim chih.
US official upa nih an chimmi cu 'North Korea cawlangh thalo lehrulnak ah lam kip aa ong cang' an ti. Tu zarh chung a si lo hmanh ah tu thla chungah cun North Korea cungah zeimaw tital in rian an tuan cang lai tiah US National security adviser Lt. Gen. H.R. McMaster nih a chim. Ref: The sun.