Hi catial ka rel i a thawtnak ka theih. Zei bantuk catial (style) dah a si ka thei lo. Hmuh ning tialmi zong a si lo; thil kong pakhatkhat kherhlaimi kong zong a si lo. Minung pakhat lungthin (feeling) phuannak a si tiin ka ruah i, ka rel cangka in a lungthin-tuar-innak ka theih.
'Nihin ah Jerusalem ah kum 49 nu nih khuaruahhar thil a tuah. Ni kum ah theihthiam lonak a um ruangah Israel police nih a fapa an kahpiak i a thi. An chimmi cu mah hnu cun a lungthin a hmaan ti lo an ti. Nihin ah Damascus Gate hmaiah police officer upa namte in sawh a timh hna i an kah.
Namte in a sawh manh hna hlanah an kah i an thah. Keimah cu ka um lo. Thah loin police nih an tlaih khawhmi zong a si ko nain kei cu ka thei lo. Ka theih khawhmi cu tlaih loin an kah. Anmah cu an him i nu cu a thi. A nun buin rak tlai hna seh law zeitluk in dah ka hei duhpiak hna. Asinain kei cu ka um lo i ka thei lo.
Nunnak le thihnak lamcan a um ah khan kei cu ka rak um lo. Police nih cun an tuah ding an tuah i anmah an i runvennak ding ahcun an tuah dingmi an tuah a hau ve. Asinain ahohmanh harnak a pek hna lomi cungah kaa lawm; an kahmi cungah ka lung a tha lo. Hi kong chim ka duh:
Nihin ah nu a thi. A fapa an rak kahpiaknak lungfah lung in a zawmi a si. A fapa zong an rak kahpiak ding hrimhrim a rak si lo. A nu zong kan ralkap le kan police cungah lungfah in harnak pek aa tim. Aho hmanh a that hna lo.
A thih a lawmh pimi zong an um. A zual chin rihmi cu 'hnawmpung ah kan hlonh cang' tiah minung pakhat nih cun a chim i, a ruak hmanthlak zong midang a hrawmh hna.
Hi nu nih khuaruahhar thil tuah aa tim. Asinain an kham manh i ahohmanh harnak a pe manh hna lo. Khuaruahhar tihnung thil tuah aa tim nain minung a si. Kan ral nih minung lo bantuk ah chan tampi chung an kan tuahser. Fihnung an kan ti, hnawmtam a kan ti.
Kanmah nih cun kan ti hna lo. An thih kan conglawmh lo. Nunnak tu kan duh i kan conglawmh. Kanmah cu minung kan si i nunnak a sunhlawihmi kan si. Midang kha 'saram' kan ti hna lo; hnawmpung tiah kan au hna lo. Minung kha minung lo bantukin kan au hna lo. Tapung le misual hmanh kha cuticun kan au hna lo.
Zeitluk in kan thinhun le kan lungfah zong ah kan in. Hmun khat ah kan mithi zun kan ngai ti i, kan nun himnak kan conglawm ti. Rili chungah Egyptian an pil ah khan 'Pathian nih thangthatnak hla sa hlah u' a kan ti. Kanmah cu minung menmen kan si - nihin ah nu a thimi zong kanmah bantuk minung a si ve.
Nihin tiang kan nun rihmi caah tu zan ah lunglawmhnak thla ka cam lai; kan thahmi nu le a fapa nih an tantakmi chungkhar hna ca zong ah thla ka cam lai. Ni khatkhat ah cun kan zapi caah thil aa thleng te ko lai timi ruahchannak le zumhnak ka ngei. Ref: TOI.
(Note: Israel ralkap theo nih a tialmi a si lai tiah ka zumh. A catial aa dawh i a tha tuk hringhran. A thiam tuk).