North Korea hruaitu upa Kim Jongnam ruak cu North Korea a phan cang tiah Taluk lei upa nih an chim. An thahnak kongah Malaysia le North Korea theihthiam lonak an ngei i, a ruak zong an pe duh colh hna lo; North Korea nih Malaysia embassy upa an hren ve hna.
Cuticun ram hnih karlak ah theihthiam lo caan zeimawzat an ngei. Asinain kap hnih hnatlaknak an tuah khawh hnuah North Korea nih Malaysian upa pakua a thlah hna i Malaysia nih Kim Jong-nam ruak an pek ve hna. Ningani ah Malaysian upa pakua cu Malaysia ah an rak phan.
Zeitin dah kap hnih ram karlak ah hnatlaknak an tuah timi theih a si rih lo. Malaysian Foreign Minister Anifah Aman nih cun 'thlennawnnak kan tuahmi cungah kan hlawhtling' tiah a chim.
Hnatlaknak an tuah khawh hnuah Kim Jong-nam ruak zong Taluk leiin North Korea leiah an tlun pi cang. Malaysia police nih North Korea embassy upa biahal an duhmi hna zong North Korea ah an tlung kho cang hna.
February 13 ah Malaysia Airport ah an rak thah i, a pum nan zoh hlanah North Korea ah kan kua u tiah an rak hal hna. Asinain Malaysia nih kan ram ah a thimi a si caah kanmah nih kan hlat a hau tiah an kua duh hna lo. A chungkhar sin lawng ah kan kuat lai an ti hna.
Mah ruangah cun atu bantuk dirhmun an phanhnak hi a si. Asinain atu cun kap hnih hnatlaknak in an karlak entainak a daihter cang lai tiah zumh a si. A thimi pa chungkhar zong Macau ah an um tiah an ruah hna i, a tu hi khawika an um zong an thei ti lo hna lo. An i thup theo lai tiah an zumh hna. Ref: BBC.