Kan hnu zarh tiang ah khan North Korea petrol man 83% tiang a kai tiah expert pakhat nih a chim. North Korea news nih a tial chihmi cu 'petrol man a kai ruangah diesel man zong a kaiter chih' a ti. Biachokvai a ummi cu Taluk nih a rengh cang ti a si.
Taluk nih 'crude oil' (tha ngaiin ser rih lomi sinaan hraan) hi North Korea sinah a kuat lengmang. North Korea nih aa bochan tukmi a si tikah Taluk nih thla thum chung a rengh ahcun North Korea hi a zeng colh lai an ti. Taluk sinin zinaan hraan a lakmi kha petrol le diesel ah a ser hna.
North Korea khua Pyongyang ah a ummi ramdang nih an chimmi cu motorcyle ngeitu pawl cu an buai ngai hna. Petrol station ah duh poah in petrol an ting ti lo an ti. Station pakhat hna ahcun ramchung cozah riantuantu upa lawng nih an lak khawh tiah Associated Press nih a report.
Petrol hngah ah aa tlangmi zong an tam i a man zong a kai ngaingai ti a si. Cheukhat nih an ruahmi cu Taluk nih North Korea a rengh cang caah a si an ti. President Trump le President Xi tonnak an ngeih lioah North Korea kong fak ngaiin an ceih.
Mah hnuah Trump nih a chimmi cu 'Taluk nih a rengh khawh ahcun Taluk le US chawlehthalnak a let in a tha lai a ti. Mah ruangah Taluk nih a renghmi a si tiin an ruah cio. Cheukhat nih an ruah thanmi cu 'Taluk nih a kan rengh cang lai' tiah thinphang in an petrol man an kaitermi a si ko lai an ti ve.
Cheukhat nih an chim thanmi cu 'ral tho sual seh law diesel le petrol tampi kan herh lai caah kan khon a hau tiah ralkap nih an rengh hna caah a si ko lai an ti than. Tam deuh nih an chim thanmi cu North Korea nih thla thum tiang ca za ding in an i khonmi asi an ti.
Cucaah Taluk nih North Korea hi reng duh taktak seh law zeitluk in dah North Korea cungah nawl a ngeih timi a lang. Asinain North Korea kong hi chim awk a tha thlu lo. Zei tiang dirhmun dah an phak te lai ti lawng aho poah nih zoh cio an si ko. Ref: BBC News.