Bom a puah lio a hmutu nu pakhat Emma Johnson nih bom a puah lio a hmuhnak kong a chim. Concert ah a fapa le a fanu an kal ve i va don hna awk ah a rak ra. A fale a hngaknak hna ah bompuahtu pa cu a hmuh.
Mipi lakah a um ve i Ariana Grande hmanthlak a cuangmi angki aa hruk. Ka hmuh ah hin tapung a si lai tiah ka zumh. A angki a puar tuk. Ka lunghring cang. Caan zeimawzat a vun rauh deuh in a puak i a kan hinh dih cikcek' tiah a chim.
BBC Radio 5 ah a chimmi cu 'bom a puahnak le ka umnak hi pe 15 hrawng lawng aa hlat. Kan fale kan hngak hna i mi hngahnak khaan chungah kan um. A puah ah hin mei ceu a chuakmi ka hmuh. Ka hmuh bak ve a puak bak ve' tiah a chim.
'A than ning, a zawng a chuah ning vialte ka hmuh i ka theih' tiah a chim chih. 'Kan lau tuk. Pawngkam cu minung pum le ruak lawng te a khat dih. Tuksum tuk hringhran a si' tiah a chim.
Tutan ISIS bom an puahmi hi 'a hmual pin khun ding in an sermi a si' tiah hlattu nih an chim. Ref: The Sun.