England, Manchester ah hlasak thiam Ariana Grande nih concert a tuah. Concert a dih bak ah bom a puak i minung 19 an thi i minung 50 hrawng an i hliam. ISIS nih twitter in teinak thawng an thanh colh. 'Kan hlawhtling i an khuaruah kan hater hna' an ti.
Tam chin lengmang i kan phomh than rih hna lai tiah bia an i kam. Bom a puah ning a fak ngai. Minung 19 an thi i tam deuh zong an thi than kho men ti a si. ISIS nih an tial thanmi cu 'hmun kip ah that hna u' an ti. A puahtu nih pumpek in puah dawh a si.
An tial thanmi cu 'Mosul hngakchia lakah bom nan thlakmi le Syria i Raqqa hngakchia lakah bom nan thlakmi hna cu nan cung Manchester ah a tlung cang' tiah a tial than. Police nih an hlat cuahmah lio a si.
Aa hliammi an tam caah sizung pasarih -riat hrawngah an thlop cuahmah lio hna an si. Concert a kaimi hna hi minung 21,000 hrawng an si. Prime Minister Theresa May nih hnemhnak bia a chim. 'Nan ngaihchiatnak kan in hrawm pi ko hna' a ti.
Hlasatu Ariana Grande biachimtu nih cun 'hlasak thiam Ariana cu a dam ko. Harnak a tong lo' tiah a ti. Ref: The sun.