December 16, 2012 ah Delhi University sianghngakcha Jyoti Singh Pandey le a tlangval pa cu baisakawp (theater) zoh ah an kal i 'The Life of Pi" film an zoh dih in an rak chuak i bus an i cit. An i citmi bus mongtu zong zu a ri i, a chungah a ummi a hawile panga zong zu an ri dih.
Jyoti Sing le a tlangval pa cu an tlaih hna i an velh hna. A ngaknu cu an tlaihhrem i pakhat hnu pakhat in an zuam chung tiang an i chaang hna. An tlaihhrem tiang lawng hmanh si loin thir fung in ngaknu thil tiang an sawhpiak. Cuticun lam kam ah an hlonh hna.
An tuahto ning a fah tuk caah ni hlei thum hnuah Jyoti cu Singapore sizung ah a thi. 'A thih lai ah a chimmi cu 'an nun bu in khangh ka duh hna' tiah a nu le a rak lengtu hna sinah a chim. Indian mipi thinhun a fak tuk i lam zawh tiang in thinhunnak an rak langhter.
Police nih a rauh hlanah minung paruk cu an tlaih hna. Minung paruk an si i minung pakhat cu kum hmasa ah amah tein aa that. Minung pakhat hi kum tling lo a rak si rih caah dat an tatmi a din deuh. Kum thum chung thong an thlak i December 20, 2015 ah an chuah.
Asinain India cozah le mipi zong an thinhung ngai. 'Dinnak nih tei loin sualnak nih a kan tei' an ti. Supreme Court nih a thongtlak ni le caan sauhter deuh zong an duh ti lo. 'Ka fanu tuarnak le ka tuarnak hi thei hna seh law an luatter hrimhrim hnga lo' tiah a nu Asha Singh nih a chim.
Minung pali an tang i September 2013 ah an bia khiakpiak an si cang nain Suprem Court ah nawlnak ca an tial than caah an thawnpiak than hna. Atu cun thah ding in an bia khiakpiak an si cang. High Court nih thah ding in an bia a khiakpiak hna i Supreme Court zong nih ningani ah a cohlan cang hna.
Thah ding in biaceihnak zung nih biachahnak an tuah cu biaceihnak zung cu au le khuannak in an khat dih. Indian mipi zong an lungtling i an biaceihnak zung biachahnak an cohlan dih. Jyoti a pa Badrinath Singh zong nih 'kan tuarnak an theih cang' tiah a chim. Thah dingmi hna cu Vinay Sharma, Akshay Thakur, Pawan Gupta le Mukesh Singh an si. Ref: CNN News.