Russian channel 9 nih Israel Prime Minister Benjamin Netanyahu cu Syria kongah Russia le Israel dirhmun an hal. A chimmi cu 'Syria van zuannak kongah Russia le Israel karlak ah riantuan tinak a um lo ahcun kap hnih karlak ah dohnak a um lai tiah Putin zong ka chimh cang' a ti.
Syria van i kan raltuknak vanlawng an zuan tikah Russia le Israel karlak ah riantuan tinak le theihternak kan ngeih lo ahcun kan i doh ko lai. Kan ralkap zong neih tuk ah a ummi an si. Pakhat le pakhat kah sual kan fawite. Cucaah kan tuan ti lai maw kan i doh lai dah tiah Putin ka chimh tiah Netanyahu nih Russian channel 9 ah a chim.
'Pakhat le pakhat karlak ah kahnak a chuah lonak ding ah ka hnatla ko. Rian kan tuan ti lai' tiah Putin nih a ka ti tiah a chim chih.
2011 ah Syria ramchung buainak a chuak i 2015 in Russia nih a rak bawmh. Syrian raltho tapung fak chin lengmang in an doh hna. Cu chungah Israel raltuknak vanlawng nih Syria ramchung an rak phomh lengmang ve. Iran nih Hezbollah raltho sinah hriamnam a pekmi hna kha Syria in a ratter lengmang tikah Israel nih an duh lo i, an phomhpiak lengmang hna.
Netanyahu nih a chim thanmi cu 'Putin zong tha tein ka chimh cang. Lebanon hmunkhur Hezbollah raltho sinah Syria le Iran nih hriamnam an pekmi hna hi kan cohlang kho lo. Kan ram caah tihnung hriamnam an si caah kan phomh lengmang hna lai' tiah ka chimh cang a ti.
Moscow le Jerusalem karlak riantuan tinak an ngei ko nain Israel nih Syria ramchung an phomh hna tikah Russia le Israel karlak ah theihthiam lonak a um lengmang. Kan hnu thla ah Israel nih Syria ramchung ah hriamnam a phurmi Hezbollah motor lian pipi an phomh i Israel ambassador Gary Koren cu Moscow ah an auh colh.
Israel nih Syria ramchung ah fak deuh an phomh tawn hna tikah Russia a lungfak lengmang than tawn.
Putin sinah a chimh thanmi cu 'Syria ramchung buainak kongah Iran he nan i pehtlaihnak nih Russia harnak an pek te lai. Iran hi kanmah caah a tihnun lawng si loin a donghnak ahcun nanmah zong harnak an pek te hna lai tiah Russian President Putin zong ka chimh cang tiah Israel Prime Minister Netanyahu nih a chim. Ref: TOI.