Atu tiang Kim Jong-un nih a lungthumh a tim lo. US nih nan lung nan thumh lo ahcun kan nuclear le missile kan hneksak lai tiah aa hrocer lengmang ko. Zarhpini ah missile a hneksak hnuah a scientist pawl hna cungah lunglawmhnak a chim.
Zarhpini a hneksakmi missile nih Kim Jong-un lung a tlinter ngai cang. Pehtlai in voihnih tiang April thla chungah a missile nih an tlolhpiak i May thla chung a hneksakmi cu nuclear hmanh a phur kho cang lai an ti i US zong a lauter ngai cang.
Naite a hneksakmi cu minute 30 chungah meng 435 a zuang kho. Van sang tuk in zuanter loin a phei deuh in zuanter ahcun meng 1,200 cu a kal kho lai an ti. ICBM tluk dengmang a si ko tiah an chim len.
Kim Jong-un nih 'nan retheihnak le nan thabatnak nih thil lianngan tuk a chuahter' tiah a scientist pawl a conglawmh hna i a thangthat hna. Bia lawng in chimh hna loin a kut he chet tiah a veih len hna. Scientist, technician pawl le ralkap pawl hna cu a pumh thup hna i dong loin lunglawmhnak kut an beng hna.
US nih a raltuknak vanlawng phurtu tilawng pi a rak thlah hnawh than ve hna. North Korea nih a timi hna cu biaruahnak ngeih nan duh ahcun kan cungah huatnak policy nan ngeihmi kal tak dih hna u law Korea in nan ralkap vialte la dih cang hna u a ti hna.
A si kho lo dingmi a si. Cucaah zei can sau dah an i ngiar lai i an i phomh te lai ti lawng a tang cang. ICBM zong kan hneksak than rih lai tiah Taluk ah thlahmi North Korea ambassador pakhat nih a chim. Ref: Thes un.