70 million minung umnak Turkey ah Khrihfami hna hi 1% hrawng lawng an si. Islam biaknak a thawng i Khrihfami hna caah tihnung taktak ram pakhat a si. April 8, 2007 ah Muslim panga nih Khrihfami biakinn zung inn ah rak luh hnawh i minung pathum an rak thah hna. Voikhat cu Easter Sunday ah Jesuh Khrih a thihnak kong drama an rak piah.
Islam in Khrihfa ah aa thleng kaami Necati Aydin zong aa tel. A chungkhar nih an duh lo tuk i meithal tiang in na kir than lo ahcun kan in kah lai tiah an rak thihpheih. Asinain Khrihfa zumhnak in kir than a duh ti lo. Jesuh a thihnak drama an piahnak ahcun a hawile Muslim panga an rak ra ve i, mipi sinah an thu. Khrihfa zumhnak kong tam deuh in theih kan duh ve an ti i, mi tha ngai bantukin an sinah an um lengmang; an rak i titermi lawng te a rak si.
Ni hra a luan hnuah an ziaza taktak a rak chuak i zung inn ah an rak luh hnawh hna i, an va tukvelh hna. Turkey Khrihfami community vialte thinphan in an rak tuah hna. Namte an rak i ken i Necati Aydin, German missionary Tilman Geske 46, le Ugur Yuksel 32 cu an rak tlaih hna i an hren hna. Police an rat hlan chung vialte suimilam pahnih chung an hrem hna.
Thutden cungah an thutter hna i an kut an leh hna i hnulei ah an tem chih hna. Germany in missionry a rami Tilman Geske nupi Shemsa nih a chimmi cu 'Khrihfami zumhnak hramhram in an hlawtter hna i Islamic thlacamnak in an camter hna' tiah a chim. Pawngkam a ummi nih zeidah an tuah timi an theih hna tikah police an chonh hna i an rak phan. Police an rak phan timi an theih in Khrihfami pathum cu an nunnak an lak lawlaw hna.
An hrom an ah hna. Police nih inn khar an bauh i an rak luh ahcun Tilman le Necti cu an rak thi cang. An kut le an ke an rak tem dih hna. Ugur tu cu tuang ah a rak ril i a thaw a chuah rih. Sizung ah a rannak in an tlik pi suimilam zeimawzat hnuah a nunnak a liam ve. Muslim an hruaitu pakhat cu a zam i inn dot li cung in a zuang i fak ngaiin aa khawn caah sizung ah a phan ve.
An dawng tein an tlaih hna i bia an halnak ah an chimmi cu 'Islam kan runvennak ah kan thahmi hna an si. Kan biaknak ral a simi hna caah zohchun ding in kan tuahmi a si. Kan ram caah kan thahmi hna an si' an ti. Nunchung thongthlak an si lai. Tutan an thahmi hna hi a voithumnak a si cang. Roman Catholic tlangbawi pakhat le a dang pakhat an rak thah cang hna.
Turkey hi Secular ram zong a si i phunghram nih biaknak zalonnak a onh ko nain Khrihfami hremnak hi a linsa tuk. Turkey mipi an khuaruahhar tukmi cu an pasal an thah hna ni tlawmpal ah an nupi le nih an pasal le thattu hna ngaihthiam bia an chimmi hi a si. Mipi theih in an sualnak kan ngaihthiam ko hna tiah an thanh. Turkey ramchung lawng si loin vawleicung ram kip in an khuaruahhar dih.
Shemsa nih 'Jesuh Khrih nih a kan ngaihthiam bantukin kan ngaihthiam ko hna. Nan ral va daw hna u tiah Jesuh nih a kan cawnpiak' tiah a chim. Shemsa nih Isaiah 61: 1-3 a rel: "Bawipa Pathian nih thlarau in a ka khahter. Sifakmi hna sinah thawng ṭha phorh awk le lung a kuaimi hna damter awk le sal i a tangmi hna sinah chuahnak thanh awk le thong chung i a ummi hna sinah luatnak thanh awkah a ka thim i a ka thlah."
The Christian Post nih bia an hal. 'Zeitin dah na pasal thattu hi na ngaihthiam khawh hna' tiah an hal i, 'Jesuh nih a ka fialmi a si' tiah a leh hna. Vawleicung ram kip in hnemhnak le dawtnak dong cat loin an dong. A chimmi cu 'kan ngaihchiatnak a fak i a tuar haar tuk ko nain Pathian vel a lianngan tuk hringhran e' tiah a chim chih. A fale pathum he Pathian rian an tuan ko rih. Ref: TCP.