US ralkap upa pakhat nih North Korea he kan i hrial kho ti lai lo. US kahnak lam ah a um peng ko. US a kap kho ding ICBM a ngei deng cang ko lai. Kan cawlcangh lo ahcun US caah hling bantuk an si cang lai tiah ralrinnak a chim.
Nizan ah Senator upa hna hmaiah US defence official pakhat nih North Korea a tihnunnak le US a him ti lonak a chimh hna. Hi hnu kum thum ahcun North Korea nih US kah khawhnak missile le nuclear a ngei cang lai tiah a chim.
Defense Intelligence Agency Director Lieutenant General Vincent Stewart a chimmi cu 'hitihin North Korea kan zoh sawhsawh ko ahcun missile le nuclear a sermi hi a hlawhtling te lai i, US hi um thiam loin a kan tuah te lai tiah a chimh ve hna.
'Zeitik ah dah North Korea missile hi a nun te lai timi kan chim kho lo. Nuclear lam hi a pial tak ti lai lo. A tuanh le a tlai lawng a si cang' tiah a chim chih. Missile expert John Schilling nih cun 2020 ahcun a lim cang ko lai a ti ve. US a kap khomi ICBM sernak ding ahcun 2020 cu a phanh a hau ko rih' tiah a chim ve.
US official upa pawl hmuh ning ahcun Norh Korea hi an zum ti lo. Missile le nuclear a sermi hi US kahnak caah a timhmi a si tiah fiang tein an theih. Cucaah zeitin dah kan kham khawh lai timi lam an kawl peng rih. Ralkap lam zong cabuai cungah a um cang ko tiah an chim. Ref: The Express.