North Korea nuclear hmun phomh ding in kan special ralkap (commando) training kan pek cuahmah lio hna an si tiah an ralbawi Army General Raymond Thomas nih a phuan. US Special ralkap (commando) pawl hi zaraan ralkap naak in a thiammi an si.
Zaraan ralkap nih an tuah khawh lomi hmun ah thlahmi le hmanmi pawl an si. North Korea phomh ding in training an ngeih cuahmah lio a si tiah US Special Operations Command upa Thomas nih a chim. An training ah aa telmi cu North Korea nuclear le missile thahpiaknak ding zong aa tel.
Hriamnam thawngthawng a kan kah tikah zeitin dah kan lehrul lai timi zong an cawn chih. US nih South Korea ah a ralkap a chiahmi hna hi 28,500 leng an si i, Japan ah 50,000 hrawng a chiah hna. North Korea ralkap hi 5.8 million hrawng an si.
US ralbawi Thomas chim ning ah cun North Korea nuclear le missile hi kan phomh hmasa a hau a ti. US le Asia kan hawile ca lawng ah ral si loin vawleicung ca tiang in tihnung ral an si cang tiah a chim. A chim thanmi cu 'poipang kan ton sual lonak ding ah training kan ngeih cuahmah lio a si' a ti.
Kan ralkap cawlcangh, thazaang le thiamnak kan hneksak cuahmah lio hna a si. A herh ahcun ram kip ah kan special ralkap kan chiahmi hna zong kan lak than rih ko hna lai' tiah a chim chih. Ref: The Express.