Nilini ah Congress tangdon khaan (House) nih Obamacare (Affordable Care Act) khirh than ding le thlen than ding in vote an thlak i 217-213 in teinak an hmuh. President Trump caah teinak taktak a si. Campaign lioah fak piin a rak chimmi cu a tling taktak cang, asinain dot khat kai than ding a ngei.
Congress cungdot khaan (Senate) ah an ceih than lai i, Senate zong ah an tei ahcun tei taktak a si cang lai. Vice President Mike Pence nih bia a chim hmasa i Trump a vun auh pah in 'Obamacare a donghnak dong hna u sih! tiah President Trump cu a vun auh.
President Trump nih cun 'Senate zong in kan lanhter khawh ko lai. Obamacare cu kan thah khen a si ko cang' tiah zum ngaiin a chim. "Health care kong timhnak kan ngeihmi hi a tha tuk tiah Trump nih cun a chim.
Obamacare naak in a tha deuh lai. Health Care nih GOP zong a kan funtom chin lengmang. Pehtlaihnak tha tuk kan ser cang. Republican Party hmun khat ah a kan funtomtu a si. Health Care man zong a tla cang' tiah President Trump nih a chim. Vote thlaknak ah Republican leiin minung 20 an i tel lo; Democrats a thlami an um lo.
Cungdot khaan ahcun a lan kho ti lai lo tiah Senator Bob Corker nih a chim. Hmai thla hrawngah an vote te lai. 'Senate zong nih kan khuakhan an dir pi ko lai tiah Trump nih cun a zumh.
March thla ah khan vote thlak an rak timh i sungh kel tein a sung ding an rak si caah an let than. President a tuan ni 100 tlinnak ah thlak an timh than i an tlamtling thiamthiam lo. Asinain lungdong loin fak piin an i zuam than i an hlawhtling cang. President Trump zong thangthat a tong len.
New York Rep. Chris Collins nih cun 'hlawhtling tiang in thil ti a thiammi Donald J. Trump a si' tiah a thangthat len. Nilini ah teinak an hmuhmi nih American mipi cheukhat lung a fahter ngai hna.
2010 ah Obamacare an rak fehter ah hin zungzal hmun ding thil bantukin a ruat cangmi zong an um. 'Hi ni le caan a rat lai dingmi hi ka rak ruat bal lo. Million leng nih kan tuar lai' tiah Democrats leiin Emanuel Cleaver nih cun a chim. Ref: CNN News.