NBC TV biahalnak ah President Trump nih FBI Director James Comey rian a phuahnak kong fianternak a tuah. 'Justice Department nih a rianphuah ding in ka hal hmanh hna hlah seh law ka phuah thiamthiam ko lai. Comey riantuan hi 'a hlah-piah bantuk a si' a ti.
'Lenglang in zoh dawh menmen in a ummi le a dir sawhsawhmi a si. FBI hi an buai tuk cang' tiah President Trump nih a chim. Asinain mipi cheukhat le upa lungfim deuh cu an lungtling cio ruam hna lo. US thimnak tuah lioah Russia hi Trump tanh in rian an rak tuan maw timi hi an hlat cuahmah lio a si.
A hlathlaimi a phi taktak an chuah pi hlanah Trump nih FBI Director Comey cu a rian in a phuah diam. Cun hlathlainak ah tangka maw minung maw tam deuh kan herh tiah FBI leiin cozah sinah bawmhnak an hal ni-hnih thum hnu hrawngah Trump nih a phuahmi a si.
Senate Democrats upa nih cun 'Comey nih a hleiin tangka le minung a hal chakmi hna kong fiang tein Justice Department sinah kan hal hna lai' an ti.
Zeiruang taktak ah a phuah timi kong an chimmi aa dang lengmang. 'Trump nih cun 'A rian ka phuah ding a si. Ka biachahnak a si cang. Deputy Attorney General Rod Rosenstein nih a rianphuah ding in a ka hal hmanh hlah seh law kan phuah ding thiamthiam a si ko' a ti.
Trump nih a phuahnak ruang a si ko lai tiah an zumhmi cu 'FBI nih Trump hi Russia he zeitluk in dah pehtlaihnak a ngeih timi an hlat. Asinain Trump nih Comey sinah a rak halmi cu 'nan ka hlathlai maw?' a rak ti. Comey nih a lehmi cu 'kan in hlathlai lo' tiah a rak leh. Asinain an rak hlathlai ko.
Cucu Trump nih a rak duh lomi a si an ti. Mah ruangah Trump zong sang tuk ah aa chia an ti. A sualnak le palhnak hlathhlai kho lo ding tiang in aa tuahmi cu upatmi FBI inn pi zuamhteih le tanglamh bantuk a si an ti.
Nilini ah caan karlak FBI Director Andrew McCabe nih upadi sertu hna hmaiah a chimmi cu 'Trump cozah le Russia karlak pehtlaihnak kongah FBI nih an hlatmi ah hin ahohmanh i thlak hna hlah seh. Thil hmaan a tuanmi FBI nu le pa hna hi nan kham kho hna lai' tiah a chimh hna.
State pakul Attorney General pawl nih 2016 thimnak ah Russia aa thlak taktak maw timi hi a dang tein hawihleikhun in hlathlainak tuah hna seh an ti. Russia aa thlak maw thlak lo timi kongah an buai ngai cang i atu tiang zong an buai. Comey phuahnak tiang a phan cang. Zei tiang dah an phak rih lai...!VOA News.