Inn Raang ah President Trump le Russia Foreign Minister Sergei Lavrov le Russia ambassador tonnak an ngei. Trump nih FBI Director James Comey rian a phuah thaizing bak te ah a si. Comey rianphuah kongah Sergei Lavrov nih capo zong in a seih len.
Inn Raang leiin an tonnak hmanthlak pakhat hmanh an tar lo. An i tonnak hi zapi hmuhhngan ah tonnak an tuahmi si loin thlithup deuh in tuahmi a si caah media zong zeimawzat lawnng nih hman an thlak khawh hna. Asinain Russian media pakhat TASS nih an i tonnak hmanthlak an tar.
Inn Raang lei nih cun pakhat hmanh an tar lo. Inn Raang leiin hmanthlatu zong an ngei ve ko nain an tar duh lo. Secretary of State Rex Tillerson le Russian foreign minister Lavrov an i ton lio hmanthlak cu an tar veve zeicatiah lenglang in tonnak an ngeihmi a si.
Asinain Inn Raang chung tonnak an ngeihmi kong tu ahcun US thin a hung ngai. 'An kan hlen' tiah Inn Raang official pakhat nih thinhung ngaiin a chim. "Hihi Russia he kan buainak lengmang cu a si. Lih an chim' tiah a chim chih.
Russian Foreign Ministry Sergei Lavrov nih 'Trump he an kut an i tlaih lio hmanhthlak a tar i, a nihchuah ngai lio a si. Sergei nih FBI Director James Comey caposeihnak a chimmi video zong Russian Foreign Ministry office nih an tar than.
Tonnak an ngeih hlanah Inn Raang chungah media dang luhter an sianh hna lo. Russia leiin an i rat pimi le Inn Raang hmanthlatu lawng hmanthlakter an si. Inn Raang nih an chimmi cu lengah hmanthlak chuahter lo ding kan ti ko zeicatiah a niam deuhmi foreign upa le President tonnak cu lenglanghter lo kha Inn Raang kal pimi lam a si.
Prime Minister le President level tonnak cu lenglang in an tuah lengmang, asinain tutan tonnak cu kha tiang dirhmun a ngeimi an si lo caah lenglanghter an duh lo. Asinain Russian lei nih cun an rak langhter len. Inn Raang cu an thinhung ngai. 'An kan hlen' an ti. Obama chan ah National Security ruahnak petu Susan Rice nih 'kan hleng hlah u' tiah twitter in a tial.
Trump le Lavrov tonnak a ngeihmi cu Putin he phone chonhnak an ngeih lioah ton ding in a chimhmi a rak si. Russian ambassador Kislyak hna hi cu sungthoh bak a si tiah US sungthoh nih cun an chim. Inn Raang Official nih 'zeitin dah kan tuah lai: Russian hi ton loin maw kan um cang hna lai?" a ti. Ref: CNN News.