2016 thimnak ah Russian le Trump minung karlak ah pehtlaihnak a um ko tiah thawngpang thar a lang cang. National Security Adviser in a rian an phuah cangmi Micheal Flynn lawng si loin Trump riantuantu upa dangdang zong an i tel len hna tiah Reuters nih a tial.
US President thimnak a donghnak thla sarih hnu lei khan cun Russian le Trump minung karlak ah phone chawnhnak a um lengmang cang. A tlawm bik ah voihleiriat cu phone an i chawn tiah Reuter nih nilini ah a tial. A min langhter a duh lomi official pakhat nih a chimmi cu 'thlithup thil cu aa tel lo' a ti.
National Security Adiver Micheal Flynn kha Russian ambassador Sergey Kislyak he pehtlaihnak an ngei i an i pehtlaih konglam fiang tein Vice President Mike Pence sinah a rak chim lo. Mah ruangah a rian in an phuah. 'A bia pimi kongah lih a chim' tiah Pence nih cun a rak ti.
Thawngpang thar an theih ning ahcun 'Voi hleiriat leng pehtlaihnak an ngeihmi chungah Trump ruahnak petu hna le Kislyak karlak ah voiruk phone chawnhnak a um' tiah Reuters nih a tial. Asinain tihnung le thlithup kong cu tel dawh a si lo.
Nithumni ah Justice Department nih James Comey hmaban pehzulh than ding le hlathlai than ding in FBI Director thing Robert Mueller tuanvo an pek cang. Sualnak le palhnak a hmuh hna ahcun tazacuai khawhnak nawl tiang an pek cang. US ramkhel tiluan a buai ngai ko rih lai. Ref: Reuters News