Nithumni ah Trump minung le Russian pehtlaihnak hlat than ding in Justice Department nih FBI Director thing Robert Mueller an khanh cang. 2016 thimnak ah Russian nih zeitluk in dah US thimnak chungah a cawlcangh i Trump minung he pehtlaihnak an ngeih timi an hlat lai.
President Trump caah cun thawngpang tha a si ruam ti lo. James Comey rian a phuahmi nih a rawk cangmi kha fak chin lengmang in a hrawh chap. Naite ah Trump nih 'nan kan hlatmi hi ngol cang ko' tiah Inn Raang i an ton lioah a chimhmi a rak chuak than. Mah khakha Trump caah thil tha lo ngai a rak si.
FBI Director James Comey rian a phuah thaizing i Russian upa pawl Inn Raang ah a tonmi hrimhrim kha mipi lung a tling lo tuk. Russian nih rawl an terhmi hna a lo cang. Robert Mueller nih James Comey hmaban cu a pehzulh cang lai.
'Special Counsel ah kan khanh cang bantukin Mueller nih a hlathlaimi chungah sualnak le palhnak a hmuh ahcun biaceihnak zung ah tazacuainak nawl zong a ngei lai' tiah Deputy Attorney General Rod Rosenstein nih min a thut cang.
President Trump nih twitter in a rak phomh colh hna. 'Obama cozah chan le Pi Clinton campaign chungah palhnak lengluang kha zeihmanh hlathlainak an tuah hna lo. Hihi American tuanbia ah hlathlainak ngan bik pakhat a si' tiah a rak zai hnawh len hna.
FBI Director thing Robert Mueller hi an bochanmi ngaimi le hmuhtonmi tam tuk a ngei cangmi a si. A hlathlainak ah zeitiang dah an rauh lai timi theih a si lo, asinain Russian le Trump minung karlak ah palhnak le sualnak an hmuh ko ahcun Trump ca lawng si loin Russia le US ca tiang in poipang a cang khomi a si. Ref: CNN News.