North Korea nih Taluk a phomhnak hi a voihnihnak hrawng a si cang. 'Taluk hi hleirawi nan hmang i zumh tlak nan si lo' tiah KCNA nih an vun phomh than hna. 'Ni fatin in Taluk leiin nihchuak bia le ziaza thalo kan theih chin lengmang' tiah a tial.
''Kan i pehtlaihnak Inntung pi a simi North Korea le Taluk pehtlaihnak hi nan hau chin lengmang cang. Kan i pehtlaihnak a rawh taktak ahcun zeidah a chuak lai timi hi Taluk nih tha deuh in nan ruah a hau' tiah fak ngaiin ralrinnak an vun pek than hna.
Korean Central News Agency (KCNA) hi North Korea ramchung media thawng bik pakhat a si. North Korea cozah nih a kut le ke bantukin aa tlaihmi an si. Taluk Media thawng bik Global Times nih fak taktak in a vun phomh colh ve hna.
'Atu hi mitcaw bantukin KCNA nih Taluk le North Korea pehtlaihnak a voithumnak an vun phomhnak a si' tiah Global Times nih a tial.
US he nan i entainak nan ngol lo ahcun dan kan in tat rih hna lai tiah Taluk nih an chimh hna hnuah atu bantukin Taluk lehlam an hrocernak hna a si. Taluk leiin an ti thanmi hna cu 'Nan nuclear program zong that cang u. Mah lo ahcun fak tukin lehrulnak nan ton lai' an.
Taluk President Xi nih North Korea ah a ummi Taluk hna cu ral a thawh sual ah tiah zam ding in nawl a pek cang hna. North Korea hi Taluk nih a tlerh tawn ko nain North Korea nih zeihmanh ah a relpiak lo. A ngaingai ti ahcun North Korea nunnak cu Taluk cungah aa hngatmi a si.
KCNA nih a chim thanmi cu 'North Kore nih Taluk he kan i pehtlaihnak kongah kan nawl hna lai lo. Hawikawm si kan duh ko tiah kan nawl hna lai lo. Hawikawm in a kan leirawi i nuclear in a kan leirawi' tiah a tial chih. Ref: The Express & Global Times.