'North Korea le Taluk pehtlaihnak kongah daithlang tuk in biachim i sum deuh u' timi tlangtar in North Korea media Korean Central News Agency (KCNA) nih nithumni ah capar pakhat a tial. Taluk cozah media Global Times zong a vun phomh chih. Global Times nih a tialmi cu 'atu hi a voithunak KCNA nih Taluk an kan phomhnak a si cang' a ti.
Tuan deuh pahnih ah khan cun Taluk min an telh lo nain Taluk a kan dohnak a si timi kan theih, asinain atu tan ahcun Taluk min an telh cang' a ti. Tuan deuh ah Global Times nih North Korea nucler hneksaknak an rak soisel cang. A hneksaknak pawngkam a ummi hna caah tihnung zong a si i,nuclear hneksak lengmang zong hi thathnemnak a um hme maw an ti. KNCA nih fianternak le an hneksakmi a thatnak le tih a nun lonak kong an tial than ve.
KNCA nih an tial thanmi cu 'Taluk media cheukhat le theihhngalhnak ngei lo politician pawl nih kan nuclear hneksaknak a kan soisel piak. Taluk caah sunghnak chuahtertu zong a si lai i, pawngkam ca zong ah tihnung a si lai an kan ti. Taluk tu hi a kan leirawitu le zumh tlak loin a ummi an si' tiah KCNA nih a ti. 'North Korea tu hi ral hmaiah a dir i, North Korea lawng si loin Taluk tiang a rungvengtu kan si' tiah a tial chih.
US nih hramhram in namneh a kan timh cuahmah lioah hmaiah kan chuak i chan pi chan sarih chung kan dironh cang hna. Kanmah ca naak hmanh in Taluk caah kan dirmi a tam deuh' tiah a tial chih. A donghnak ah a tialmi cu 'Taluk nih kan i pektlaihnak hi tha deuh in nan ruah a hau. Daithlaang tuk in kan i pehtlaihnak nan hrawh ahcun zeitluk tihnung nih dah an zulh hna lai' tiah an hrocer hna.
Global Times nih an vun lehmi hna cu 'Taluk, People Daily le Global Times min dah ti lo cun tha ngaiin bochan tlak information an langhter khawhmi a um lo. Thisa in ram dawtnak in a khat menmen catial a si' a ti. A tial thanmi cu 'Pyongyang he 'ha caah ha; mit caah mit' tiin biaal kan duh lo. Asinain Pyongyang nih zei bantuk nan chim hmanh ah kan ruahnak cu kan chim lengmang ko lai' tiah Global Times nih a tial.
North Korea nih nuclear nan hneksak than ahcun nan ruah lo piin Taluk nih lehrulnak kan tuah cang lai. Taluk nih hi biachim hi kan i congor lo. Atu le atu zong in biaal lengamng kan hau lo. Taluk kan dirhmun cu a fiang ko tiah a tial. Taluk le North Korea kan i dannak le kan i lawhnak cu biaalnak in kan damter kho lai lo. Nan catial kan zoh tikah ram 'caah thathnemnak timi hi nan fiang lo timi kan theih' ti.
Nan nuclear hneksaknak nih zeitluk in dah Nichuah-chak kan minung lungre a theihter hna timi nan thei lo. Cucaah saang deuh in Beijing le Pyongyang karlak ah biaruahnak zong a um hau a ti. Biaruahnak kan ngeih hnu lawngah Pyongyang nih mitcaw bantukin Taluk nan i bochanmi hi nan fiang lai. Nuclear hi nan nunnak tluk ah nan ruah buin Taluk hi mitcaw bantukin bochan awk a rak tha lo timi nan fiang lai.
Hi bantukin nan ziaza le lungput a si komi cu zeitin dah Taluk nih kan in pehtlaih peng hna lai. Nan nuclear policy kongah kan in dirpi kho hna lo. Cucaah kan i pehtlaihnak le nan nuclear policy hi a kal ti thiam ding an si lo. US le North Korea buainak hi zei tiang dah a phak te lai kan thei lo. Taluk nih kap hnih biaruahnak ngeih ding in kan in duh pi hna. Taluk nih bamwh ding in timh cia kan si.
Taluk le North Korea pehtlaihnak cu Taluk kut cungah a ummi a si. Zei bantuk hmanh in chim ko u. A poi ah kan chia lo. A poi dingmi cu zeidah na tuah than lai timi cungah aa hngat te lai. Ca nan tial deuh tikah Taluk in nan ruahnak kan theih chin lengmang. Nan nuclear kong damter hi zeitluk in dah a har timi zong kan theih chin lengmang. Ref: Global Times.