Kan ram himnak caah tihnung thil na tuah ahcun kan in kah lai tiah Taluk nih North Korea cu a hro cang. Nihnihni ah khan North Korea nih 'kan ram hnih karlak pehtlaihnak nan kan leirawi ahcun fak tuk in kan in lehrul hna lai' tiah Taluk cu an hrocer hna.
Taluk leiin an vun leh colh than hna. Taluk media People's Daily nih an tialmi cu 'nan biachim le hrocer ning hi ram tanhnak thisa tiang lawng a si. Ram pakhat miaknak (national interest) le ram tanhnak thisa hi aa dangmi a si. Nan ram tanh ning hi ram miaknak a si lo tiah a ti hna.
Global Times nih a tial thanmi cu 'kan ram miaknak le himnak ding cu a herh ning paoh in kan runven lai. Hihi Taluk nichuah-chak himnak le daihnak a si. Nan nuclear program thihpheihnak hi kan cohlang kho lo.
North Korea nih nan nuclear program nan zulh peng i kan ram himnak le daihnak nan hrawh ahcun Taluk nih ralkap zong kan hman hna lai. Nan nuclear hmun tiang in kan ralkap nih an in hrawhpiak hna lai tiah a hrocer hna.
Taluk Foreign Ministry biachimtu Geng Shuang nih a chimmi cu 'North Korea nuclear program kongah Taluk kan dirhmun cu a fiang ko tiah a chim. President Trump le Taluk President Xi tonnak an ngeih hnu in Taluk dirhmun fak piin aa thleng.
North Korea le Taluk hi Ralpi Pahnihnak a dih hnu in an i pehtlaihnak a tha tuk cang. Taluk nih sipuaizi in a siah diplomatic lam in a siah a dirkamh lengmang. Asinain naite cun Taluk nih fak ngaiin a rengh cang. North Korea zong an thinhung ngai.
'Naite in Taluk leiin daithlang biachim kan theih chin lengmang. Inn tung bantuk a simi kan i pehtlaihnak chah ding tiang in an chim lengmang cang. Kan i pehtlaihnak an chah taktak ahcun tihnung thil nih a zulh colh hna lai' tiah North Korea media KCNA nih fak ngaiin a tial. Ref: The Express.