US Pacific Commander Harry Harris hi a rian in kan dinhterpiak cang u tiah Taluk nih US an hal cang hna tiah Japan media Kyodo News nih a tial. Harry hi Taluk nih an rak tih ngaimi a rak si zeicatiah atu lio Korea hrawng i US cawlcangh hi Harry ruang lawng te a si.
Taluk le North Korea tlaihhip khawhnak ding ah an bochan ngaimi cu Harry hi a si. President Trump zong nih a bochan taktakmi a si. Korea rili ah a raltuknak vanlawng phurtu le nuclear phurtu tilawng (submarine) tiang a rattertu hi Harry a si.
Korea hrawnghrang US cawlcanghnak hnulei puanzar phen ah a rak ummi Harry a si ti hi Taluk zong fiang tein an rak theih. South Korea ah an chiah THAAD missile zong Harry khuakhannak lawng te a si an ti.
Mah ruangah US Pacific Commander Harry Harris hi Asia ram ah a cawlcangh lengmang ah cun Taluk caah ral a si lai timi an theih. Japan media Kyodo nih a tialmi cu 'North Korea nuclear program dan kan in tatpiak hna caah Harry zong a rian in kan dinhterpiak u' tiah Taluk nih an nawl hna tiah a tial.
North Korea zong Taluk nih a rengh ngai ko timi a lang. A voiruknak nuclear ka hneksak lai a timi zong atu tiang a hneksak rih lo. Taluk le North Korea karlak ah zong theihthiam lonak a um len timi zong theih a si. Asinain Taluk lonh in a cawlcang ngam lai lo timi zong theih khawh a si. Ref: The Express.