Afghan hmunkhur ISIS sakhaan cu zahan zan ah US special ralkap le Afghan (commondo) ralkap nih an va phomh hna. An hruaitu Abdul Hasib an thah khawh. US ralkap zong pahnih an thi tiah report nih a tial. Fak ngaiin an phomh hna.
ISIS hruaitu Abdul Hasib hi a sual taktakmi a si. Afghan khuate hrawnghrang ah an tih i an celh lomi a si. Khuabawi kip an hngawng a tan hna, nu an fir hna i an nupi ah an ser hna. General John Nicholson nih a chimmi cu 'Hasib sualnak hi an celh lo' a ti.
A chim thanmi cu 'mipi a hrem hna ning zong a hrang, a thah hna, buainak a ser hnawh hna. Kan thah khawhmi nih khuate kip ah daihnak tampi a serpiak than hna lai' a ti. US drone nih ni kum ah an hruaitu Hafiz Saeed Khan a rak thah hnu in Abdul Sahib nih a hruai hna.
A luan cia kum hnih hrawng in Afghan i ISIS cawlcangh hi tih a nung ngai. A hleiin thlang Nangarhar peng hrawng ko ah hin an hrang khun.
General John Nicholson nih a chim thanmi cu 'hlawhtling ngaiin kan va phomh khawhmi hna nih ISIS cawlcanghnak tampi a zorter cang lai. Dong loin ISIS hi kan phomh lengmang hna. Thla kua chung kan dawinak hna ah an hruaitu le an ralkap tampi kan thah cang hna a ti.
Afghanistan ah a rak rami ISIS paoh cu atu kan thahmi hna bantukin kan thah thluahmah hna lai. Afghan ah daihnak le himnak kan tlunter than lai tiah a chim chih. Ref: The sun.