President Trump cu Obama he cun van le vawlei bantukin an i dang taktak ko. Trump cu an rak tih cio ko. Thla tlawmpal te chung a cawlcangh le riantuan hrimhrim hi tih lo awk a rak tha lo. A huaisen taktakmi Israel hmanh Trump he ton lai cu an thinphang ko.
Russian sinah thlithup information a pek ruangah Israel an thinhung kho tuk. Israel sungthoh le American sungthoh cu thlithup information aa hrawmmi an si caah US cungah Israel thin a hung ngai. Russian sinah a pekmi information ruangah Middle East kan sungthoh pawl harnak an tong sual lai tiah an thinphan ngai.
Asinain Trump ing kan puanter sual lai tiah an kaa an i cip dih. An media tiang in ralrin taktak in ca an tial hna. Atu lio cu Inn Raang leiah Comey kongah an buai lio pi a si i, Trump zong a lungthin aa tuai cur lio a si tikah a lung kan ton lo ahcun mithmai tha a kan pe sual lai lo ti an phang.
Nirukni ah Israel parliament nih Palestinian sipuaizi bawmhnak kong an ceih. Trump lungton duh ah a si. Tu chun zong ah Israel Prime Minister Netanyahu nih 'lunglawm tein kan in don' tiah a don cia cang. 'US hruaitu he daihnak kan ser khawhnak ding lam ka ceih pi lai' tiah a chim chih.
Mr. Netanyahu nih 'Mr. President, nan kan tlawn lai kan in zoh ko. Israel miphun nih kau piin kan in don lai' tiah a chim. 'A thawng tukmi US he kan i hawikawmhnak kan thawnter chin lengmang khawhnak hnga ka ceih pi lai; kan himnak kong ka ceih pi lai; daihnak lam kan ser khawhnak hnga ka ceih pi lai' tiah a chim chih.
Palestinian le Israel kong an ceih lai. Prime Minister Netanyahu zong a ton lai i, Palestinian hruaitu Abbas zong a ton lai. An karlak dah daihnak a um khawhnak hnga an ceih lai. May 23 hi Israel nih Jerusalem an lak kum 50 tlinnak camtuak an tuah lai i, Trump nih zeidah a chimh te hna lai theih a si rih lo. Israel nih cun 'Jerusalem hi Israel khuapi a si cang' tiah kan thanhpiak seh ti an duh. Ref: TOI.