Korea rili ah US raltuknak vanlawng phurtu a phanh hnu in North Korea nih a thinhunnak fak ngaiin a vun langhter than. Pehtlai in zarh khat chungah voihnih bakte a missile a hneksak. North Korea hruaitu Kim Jong-un nih US a hrocer ning a fak chin lengmang.
President Trump nih a raltuknak vanlawng phurtu USS Carl Vinson cu South Korea ah a rak thlah than. North Korea kan hrocer an ti lioah North Korea tu nih a thinhunnak fak chin lengmang in a chuah hnawh hna. Korea in US ralkap an chuah hlan paoh cu ka ngol lai lo a ti.
Korea rili hrawng i US raltuknak tilawng cawlcangh hi North Korea thinhunter duh bia a si ko. Fak tuk in kan phomh hna lai. US cawlcang hi hruh tuk bia a si. North Korea namneh a kan timh lengmang' tiah North Korea media Rodong Sinmun nih a tial.
'Zaangfahnak kan ngei cawk te hna lai lo i, nuclear in kan phomh te hna lai. US ralkap cawlcang hi mi kip nih fiang tein an hmuh dih hna i an theih dih hna. Kan daihnak a hrawktu an si' a tial chih. Japan le S. Korea hrawng i US ralkap cawlcangh hi North Korea hi a rak rem lo.
'Hi bantukin namneh hmang US nih a pehzulh lengmang ko ahcun fak tuk in kan phomh te hna lai. Phorhlawtnak in a khatmi US phomh ding in kan nuclear zong timh cia a si. US nih a lung a thumh lo ahcun North Korea kan dirhmun aa thleng lai lo' tiah fak ngaiin a tial. Ref: The Express.